L’Arribada entama güei la so tercer edición cola llegada de los escritores al Muelle de Xixón

L’Arribada 2008 va entamar güei vienres, como ficiere na edición anterior, cola llegada de los congresistes a El Muelle de Xixón, a les cinco la tarde. A les seis, yá nel Salón d’Actos del Antiguu Institutu Xovellanos, va procedese a la inauguración del eventu, cola presencia de políticos y miembros de la organización. Media hora más tarde va facese un homenaxe al escritor Antonio González Busto, decanu de los lliteratos asturianos. El día va pesllase a partir de les siete cola llectura de testos lliterarios per parte de representantes de los grupos polítcicos del Conceyu de Xixón.

La segunda xornada de l’Arribada va entamar a les once la mañana del sábadu cola presentación de la revista Al debalu, asoleyada por Espublizastur. A les 11:30 hores Xaviel Vilareyo va falar de “La llingua asturiana en Salamanca y Cantabria” y a les doce va presentase la obre “Los venticinco pasos”, poemariu de Rubén d’Areñes. “Lais de la vieya Bretaña”, de María de Francia, va presentase a les 12:30 hores.

Más tarde, a la una, Nicolás Bartolomé Pérez va presentar “La tradición oral nel ámbitu asturlleonés”.

A les cuatro la tarde, Xaviel Vilareyo, va falar n’esti casu, teniendo como tema la ponencia “Festival de cine asturianu: cuatro años de camín”.

La revista lliteraria “Estandoiru” va presentar el so primer númberu a les 17 hores. Media hora dempués Faustino Zapico va presentar “La revolución de mayu de 1808”, asoleyada por Trabe ediciones. Darréu, la tema del llibru va dar pa una tertulia col autor, l’empresariu y escritor Inaciu Iglesias, l’escirtor L.luis Fernández, l’escritor Xosé Nel Riesgo y l’abogáu de l’Arribada, Roberto González.

A les 18:30 hores, Pilar Sánchez Vicente va presentar la novela en castellán, “La diosa contra Roma”.

A les siete la tarde, Xurde Morán, Alberto Álvarez Peña y Mari Luz Pontón van participar na tertulia “Cultura tradicional y llingua nes televisiones d’Asturies”. A les 19:30, Xurde Blanco va introducir la sesión de “cinema y lliteratura”, onde va poder vese “Los que vuelven”. La nueche del sábadu va pesllala l’actuación del grupu “Kadarma”.

El domingu la xornada va celebrase de mañana y va entamar con dos presentaciones, la del Atles Sonoru de la Llngua Asturiana a les 11 la mañana y cola presencia de Fernando Ornosa y Jesús Suárez López y a les once y media, la presentación del “Diccionario Toponímico del Concejo de Gijón”, de Ramón d’Andrés.

A les 12 Neto va presentar la recopilación de tires cómiques “Na punta la llingua” y al es doce y media David Guardado va presentar la obra “Llingua estandar y normalización llingüística”, asoleyada por Araz Llibros.

A la una va fallase’l premiu Timón, que l’añu pasáu foi a parar a manes de la escritora valdesana Nené Losada, y un cuartu d’hora más tarde, va producise l’actuación del grupu “A la gueta la runa”. Les actividaes van tornar na tarde del llunes y hasta’l sábadu siguente.