Izquierda Xunida pospón la reforma del estatutu pa depués de les ellecciones

El coordinador d’Izquierda Xunida, Jesús Iglesias, afirmó ayer que “se perdió una oportunidá pa facer un nuevu testu estatutariu” responsabilizando d’ello al PP pol so “bloquéu” p’abordar la reforma. Como prioridá pal prósimu cursu políticu IX establez el modelu de financiación d’Asturies. Jesús Iglesias sobrayó que «amás de l’aprobación del Estatutu, Asturies necesita un nuevu modelu de financiación» alertando de que “si nun s’algama nengún de los dos, Asturies quedaría fuera del xuegu políticu”.
Pa Izquierda Xunida la finananciación ha cuntar “non sólo’l númeru d’habitantes, sinon les peculiaridaes y necesidaes d’Asturies, asina como mantener los mecanismos de solidariedá que’l país necesita”. Izquierda Xunida fizo referencia al superavit del Estaú, nesti primer semestre, de 2000 millones d’euros, “qu’habríen valir pa que les comunidaes tuvieren más recursos en vivienda y serviciones sociales”. Iglesias propón que l’alderique sobre la financiación entame a entamos de setiembre pa tener cerráu’l nuevu modelu n’ochobre; d’esta forma la nueva financiación taría na mesa de los presupuestos de 2007.