IX y Podemos ponen l’acentu nel asturianu nes sos intervenciones na Xunta Xeneral

Los diputaos d’Izquierda Xunida y Podemos reivindicaron esti xueves l’usu de la llingua asturiana na Xunta Xeneral del Principáu, emplegándola y criticando’l so arrequexamientu en tolos ámbitos.

Ovidio Zapico, diputáu d’IX na Xunta Xeneral, realizó esta mañana una reconocencia a la llingua asturiana usándola pa entamar la so interpelación al Gobiernu sobre los trenes de cercaníes. “Llingua y cercaníes aseméyense en munches coses”, dixo’l diputáu de IU primero d’afitar que les dos tan cerca de morrer y non precisamente porque Izquierda Xunida “dexe de caltener viva la so llama”.

La llingua y les llínees ferroviaries de cercaníes tan na opinión d’IX “les dos arrequexaes y en procesu de desaniciu por mor de quien gobernó en Madrid toos estos años y de quien equí yos sigue’l pasu”, dixo Zapico refiriéndose tantu al Gobiernu del PP como al socialista asturianu.

Pela so parte, el diputáu de Podemos Héctor Piernavieja aprovechó una pregunta al Conseyeru d’Educación pa dexar tamién afitao que “sirva esta entruga y la so contestación p’amosar a determinaos grupos d’esta cámara que nun puen votar escontra la llibertá de falar asturianu”. El diputáu fizo alcordanza de que la Declaración Universal de los Drechos Humanos recueye los drechos llingüísticos y dixo que “esta cámara va usar l’asturianu porque ye un drechu de los que tamos equí y de miles de persones fora. Namás los retrógrados puen votar escontra los drechos humanos”.

El conseyeru d’Educación y Cultura, contestó al diputáu Héctor Piernavieja que’l gobiernu asturianu va modificar el curriculum del segundu ciclu d’Infantil pa¡’asegurar l’enseñu del asturianu n’esta etapa educativa y que los escolinos de los colexos mierense Llerón Clarín y Anicetu Sela tendrán 3 hores d’asturianu, en rempuesta a la entruga que-y facía.