IX-BA quier qu’Asturies se defina estatutariamente como nacionalidá histórica

Izquierda Xunida-Bloque por Asturies defende la definición d’Asturies como nacionalidá histórica nel futuru Estatutu d’Autonomía porque estimen qu’esti fechu puede ser determinante pa garantizar el másimu nivel d’autogobiernu pal Principáu. Nel documentu que’l conseyu políticu d’IX aprobó la selmana pasada y qu’agora ta en manes del Bloque por Asturies pa la so redacción defenitiva, el reconocimientu d’Asturies como nacionalidá histórica y la oficialidá del asturianu, son dos de les cuestiones prioritaries de cara a la reforma estatutaria.

Jesús Iglesias anunció ayeri que, tal y como taba previsto, la ellaboración d’esti documentu va tar acabada esta selmana pa poder empezar, al finales de mes, les rondes de contactos con organizaciones sociales, empresariales, moces y col movimientu asturianista col envís de que faigan les aportaciones qu’estimen convenientes. Yá qu’en palabres d’Iglesias, “IX reivindica que sía la voluntá de los asturianos la que ponga’l techu másimu competencial”.