IX-BA amuésense contentos pol aumentu nun 20% en política llingüística

El coordinador xeneral d’Izquierda Xunida d’Asturies, Jesús Iglesias, y el secretariu xeneral del Bloque por Asturies, Roberto Colunga, amosáronse contentos del resultáu de la negociación presupuestaria colos sos socios del PSOE tocante a les sos pretensiones en política cultural. Nuna rueda de prensa convocada pa valorar les cuentes de la comunidá resaltaron l’aumentu nun 20% del dineru empobináu a promoción y planificación llingüística.

Depués de los recientes desalcuentros calteníos ente la coalición IX-BA colos sos socios de gobiernu del PSOE por cuenta de la política siguida pola Conseyería de Cultura en materia de normalización llingüística y de la rocea barruntada a propósitu de les partíes reservaes pal asturianu nel proyectu presupuestariu del executivu, entrambes partes paecen haber llegao a un alcuerdu p’aumentar estes partíes na midida deseada pol responsable de la Oficina de Política Llingüística, Ramón d’Andrés: alrodiu d’un 20% respective al exerciciu anterior.

Col aumentu de la partida presupuestaria en materia llingüística, Cultura espera cubrir les espectavives xeneraes pola prósima puesta en marcha y aplicación del Plan de Normalización, qu’habrá tar ellaboráu y aprobáu enantes de fin d’añu, según anunciara’l presidente asturianu Vicente Álvarez Areces apocayá nel Debate d’Orientación Política del Principáu. El sofitu a la Rede de Normalización Llingüística de los conceyos y la revisión toponímica van ser otros de los proyectos favorecíos por esti medre nel presupuestu destináu a la promoción de la llingua asturiana. Cúmplense asina les desixencies planteaes nesta materia polos representantes d’Izquierda Xunida-Bloque por Asturies na negociación de les cuentes autonómioques colos socialistes nel gobiernu de coalición.

Na rueda de prensa celebrada na sé d’Izquierda Xunida d’Asturies, n’Uviéu, los cabezaleros de les dos formaciones firmantes del alcuerdu de gobiernu col PSOE d’a mediaos de 2003 amosáronse tamién contentos por otres desixencies en política cultural como un aumentu nes cantidaes empobinaes al complexu arqueolóxicu de Tito Bustillo, en Ribesella; al parque prehestóric de Teberga o al Centru d’Arte d’Avilés. Ciérrase asina un capítulu de negociación qu’empezó solmenáu de tensiones y desalcuentros, sobremanera no tocante ala posición caltenida pol PSOE y la titular de Cultura, Ana Rosa Migoya respective a la política llingüística. L’últimu desalcuentru tuvo fecha recién al desvelase que Migoya nun asistió a un importante alcuentru de gobiernos autonómicos de comunidaes con llingua propia y qu’amás ocultó esa información a los sos socios de gobiernu. Entós, el conseyeru d’Izquierda Xunida, García Valledor y el coordinador xeneral de la coalición n’Asturies, Jesús Iglesias tuvieron dures palabres pa la falta de sensibilidá del PSOE respective al asturianu. Agora estes diferencies paecen salvaes pa consiguir l’aprebación de los presupuestos autonómicos pa 2005.