IX apuesta por incluyir na axenda política la cooficialidá del asturianu

IX apuesta por incluyir na axenda política la cooficialidá del asturianu antes del fin de llexislatura, sigún dexó afitao esti martes Alejandro Suárez, quien fizo l’anuncia de que van sofitar la presentación d’una iniciativa pa la reforma del Estatutu na Xunta Xeneral del Principáu.

IX d’Asturies va sofitar la inclusión na axenda política inmediata de la cooficialidá del asturianu. Asina lo aseguró esti martes el secretariu d’Organización de la formación, Alejandro Suarez, qu’esplicó qu’el so partíu va sumar a aquelles iniciatives empobinaes a llograr la máxima reconocencia llegal a la llingua por aciu la so plasmación nel Estatutu d’Autonomía.

“La posición d’IX cola tema de la oficialidá ye histórica y, por tanto, cuando un grupu propón xunise a ello, vamos faelo, y siempres que se plantegue esti alderique nós vamos tar a favor”, dixo Suarez esti martes pela mañana, xustamente antes de que responsables d’IX y Podemos Asturies, aconceyaran nel Palaciu de la Xunta pa falar del calendariu posible pa llevar al Parlamentu esta iniciativa.

A xuiciu del secretariu d’Organización d’IX d’Asturies, esiste necesidá pa la oficialidá, daqué pa lo que, añedió, “nós llevamos nesta fienda un montón de tiempu“. Más allá de discutinios, Alejandro Suárez esplicó que l’oxetivu ye llevar a la Xunta lo más aína una propuesta que dexe’l so discutiniu por tolos grupos buscando’l máximu sofitu.