Iniciativa revela que’l Gobiernu reconoz que se vulneró la llei d’usu del asturianu

Iniciativa pol Asturianu vieno acabante de facer público que’l Gobiernu d’Asturies reconoz que se vulneró la llei al esixir a una ciudadana que nun usare l’asturianu. “Pa Iniciativa pol Asturianu situaciones como estes afiten, una vegada más, que la oficialidá de la llingua asturiana ye necesaria”, afiten nun comunicáu.

Inaciu Galán, presidente d’Iniciativa pol Asturianu, dixo esta mañana que “dende la nuesa organización fiximos pública una denuncia pasáu mes de setiembre relativa a la quexa d’una ciudadana que foi discriminada por utilizar l’asturianu nuna conversación telefónica con una funcionaria de la Conseyería d’Educación. Por mor d’esta situación dende la organización mandamos un escritu al Gobiernu d’Asturies reclamando una disculpa, más mecanismos de formación y un compromisu per parte de los responsables de la Conseyería pa qu’estes situaciones nun vuelvan a ocurrir”.

Galán añadió que “na rempuesta recibida, el Gobiernu d’Asturies reconoz que nun se tenía que tener indicao a la ciudadana cambiar de llingua yá que la Llei 1/1998 d’usu y promoción del asturianu, nel so artículu 4.2 dexa claro’l drechu de los ciudadanos a dirixise a l’Alministración del Principáu usando l’asturianu de forma oral como yera nesti casu concretu”.

“Iniciativa pol Asturianu quier aprovechar p’agradecer la disculpa fecha dende la Secretaría Xeneral Técnica y el compromisu col cumplimientu de la Llei 1/1998 pela Conseyería d’Educación y Cultura d’Asturies. En tou casu, situaciones inaceptables como estes afiten, una vegada más, que la oficialidá de la llingua asturiana ye necesaria, nun val con dicir que l’asturianu yá ta protexíu cola Llei d’Usu o que yá ye suficiente una norma que s’incumple ensin nengún tipu de problema. Hai que dir más allá y que los drechos llingüísticos de les y los falantes d’asturianu tean reconocíos” remató’l presidente de la organización.