Iniciativa pol Asturianu celebra la recepción del so videu sobre la oficialidá

Iniciativa pol Asturianu celebra la bonísima recepción del so videu informativu sobre la oficialidá per parte de la sociedá asturiana y quier agradecer a tola ciudadanía asturiana la bona acoyida del videu en rempuesta a les falses idees y argumentos espuestos pol PP de Cherines.Iniciativa pol Asturianu da les gracies esti día nuna nota de prensa a los diferentes medios de comunicación pola importante difusión fecha del documentu que pudo vese n’informativos y en tolos principales medios informativos d’Asturies.

Inaciu Galán, presidente d’Iniciativa pol Asturianu, quixo esta mañana celebrar la bonísima recepción del videu informativu per parte de la sociedá asturiana. Galán añadió que “frente a manipulaciones, xeneralidaes y mentires que solo quieren emporcar la vida política d’Asturies dende Iniciativa pol Asturianu respondimos con argumentos sólidos, con rigor y seriedá”.

El presidente de la organización añadió que “tamos mui contentos col resultáu d’esta campaña: en poques hores en llegamos a casi 100.000 persones convirtiéndose esta publicación en viral. Los resultaos en redes sociales como Facebook, Twitter, Instagram o YouTube algamaron miles y miles de visites que sirvieron pa dar a conocer la postura y argumentos irrefutables sobre la oficialidá y los sos beneficios pa la sociedá asturiana. Gracies a esti videu muncha xente tá interesándose pola situación del idioma y ficiéronse socios d’Iniciativa pol Asturianu”.

“Dende Iniciativa pol Asturianu queremos aprovechar pa recordar al Partido Popular que los tamos esperando colos brazos abiertos nesta reivindicación de la oficialidá de la llingua asturiana que n’otros llugares asumen con total normalidá como ye’l casu de Galicia. Ellí Feijóo continuamente fala de les bondaes de la oficialidá y la utilización del gallegu con total llibertá y como la oficialidá foi positiva pa Galicia. Por ello, nun entendemos la postura de Cherines, cuando amás la metá de los votantes del PP d’Asturies son partidarios de la oficialidá del asturianu” apuntó Galán.
Inaciu Galán acabó dando les gracies en nome d’Iniciativa pol Asturianu a los diferentes medios de comunicación pola importante difusión fecha del documentu audiovisual que pudo vese n’informativos y en tolos principales medios informativos d’Asturies.