Iniciativa pide que l’asturianu tenga pesu nes convocatories d’Asturies

Iniciativa pol Asturianu pide que l’asturianu tenga pesu na puntuación de les convocatories del Gobiernu d’Asturies, darréu de que la selmana pasada hubiera una ufierta pública sobre señalización d’espacios turísticos que nun facía nenguna referencia al asturianu o al usu de la toponimia tradicional de los llugares.

Iniciativa pol Asturianu vieno acabante pidir esta selmana que l’asturianu tenga pesu na puntuación y na baremación de les convocatories y concursos del Gobiernu d’Asturies. La organización espresó al traviés del so presidente, Iván Llera, la reclamación de que l’idioma tien que tener un pesu específicu nes diferentes campañes qu’entame’l Gobiernu del Principáu al traviés de los concursos públicos.

Llera aclaró que “a lo llargo de la selmana pasada hubo una ufierta pública sobre señalización d’espacios turísticos que nun facía nenguna referencia al asturianu o al usu de la toponimia tradicional de los llugares. Resulta mui llamativo qu’esta ufierta na que nun ta presente esa importancia del asturianu na baremación de la puntuación venga precisamente de la Conseyería de Cultura, Política Llingüística y Turismu. Nun puede ser que pal área de Gobiernu que tien les competencies de política llingüística l’idioma nun tenga un papel importante”.

El presidente de la organización declaró que “les bases de les sovenciones deben d’incluyir la puntuación del usu billingüe na rotulación y la obligación del usu de los topónimos tradicionales tal y como establez la Llei 1/98, de 23 de marzu, d’Usu y Promoción del Asturianu. Y nun solamente les propies de la Conseyería de Cultura, tien que ser tresversal en tola acción de Gobiernu. Otres campañes como los Planes Estratéxicos del Comerciu que dependen de la Conseyería d’Industria, Empléu y Promoción Económica tamién tienen que favorecer esi usu normal del asturianu”.

Nesi sentíu, Iván Llera apuntó que “esti tipu de concursos públicos tamién tienen que tener presente l’usu normal del asturianu sobremanera en campañes que tienen muncha visualización. Amás, l’usu del asturianu en campañes como esta nun implica un mayor gastu, col mesmu coste llogramos visibilizar l’idioma, da-y normalidá al usu de la llingua asturiana y cumplir la propia Llei d’Usu”.

P’acabar, Llera reclamó qu’el Gobiernu d’Asturies tien que facer un esfuerciu y siguir dando pasos en toles Conseyeríes pa facer normal l’usu del idioma en toles campañes entamaes dende l’Alministración.