Iniciativa entama una campaña d’espardimientu del topónimu Uviéu

Iniciativa pol Asturianu da a conocer documentos que acrediten l’usu del topónimu “Uviéu” dende 1832 y de forma continuada hasta güei nuna nota de prensa na que fai anuncia d’una campaña informativa al respective.

La entidá, que siempre amosó’l so sofitu al procesu de oficialización de la toponimia, uvieina fai esta campaña informativa  porque siempre vio como un avance positivu la oficialización del topónimu tradicional d’Uviéu, asina como del restu de nomes de llugar del conceyu. Agora vieno acabante asoleyar la campaña “El topónimu Uviéu na documentación histórica”, onde apaez la denominación agora oficial xunto a Oviedo, “Uviéu”, en testos del añu 1832 tanto n’asturianu como en castellán pertenecientes, por exemplu a Teodoro Cuesta, Pachín de Melás, José Napoleón Acebal, espublizaos na prensa y distintes publicaciones d’antaño en toles époques históriques, dende principios del sieglu XIX.

La oficialización de la toponimia ye pa la entidá una forma de recuperar y poner en valor la nuesa cultura y el patrimoniu llingüísticu de tolos asturianos y asturianes, y recuerda que “amás de ser populares y tradicionales tán dientro del desendolcu de la Llei d’usu y promoción del asturianu de 1998, polo que ye un mandatu llegal poner en marcha estos procesos de recuperación, al qu’Uviéu ye l’últimu de los conceyos que llega”. Dende Iniciativa pol Asturianu “queremos sofitar los avances llegales nesta cuestión y amosar a la sociedá asturiana el valir históricu y social de la toponimia tradicional. Ye preciso recordar amás que foi Gabino de Lorenzo, alcalde del PP, quien punxo en marcha esti procesu qu’agora quedará zarráu cola publicación del decretu nel BOPA”.

N’Iniciativa piden a les alministraciones y a toles entidaes públiques y privaes que faigan agora un esfuerciu por da-y visibilidá al topónimu Uviéu, y al restu de topónimos del conceyu, en tolos espacios nos que s’use la toponimia (señales, cartelería, megafoníes, documentación oficial, publicidá, etc.) Les nueves plaques de les cais d’Uviéu son una oportunidá pa ello, yá qu’apaez l’escudu de la ciudá xunto al nome del conceyu, nesti momentu, y anque sí apaez la denominación “Calle/cai” en billingüe, habría ponese tamién el topónimu Uviéu al mesmu tamañu y col mesmu tratamientu gráficu que la forma Oviedo.