‘Green Book’ separta a ‘Roma’ de la gloria como meyor película de los Oscar

Green Book dio la sorpresa al final na nueche de los Oscar al alzase col premiu más importante de la ceremonia, la de meyor película, que foi apurríu por una sonriente Julia Roberts.

El filme empobináu por Peter Farrelly llogró trés estauínes doraes de los cinco nes que competía: película, guión orixinal y actor secundariu (Mahershala Ali) y acabó imponiéndose contra tou pronósticu a la Roma d’Alfonso Cuarón, que prometía faer hestoria nesta 91ª edición. La carta d’amor del realizador a la so añada ‘Libo’ Rodríguez y a la so infancia nel México de los años setenta llogró trés de los diez premios a los qu’aspiraba: película de fala non inglesa, director y fotografía.

Peter Farrelly salió al escenariu del teatru Dolby de Los Ánxeles con tol equipu de la película y estimó especialmente al protagonista Viggo Mortensen la so participación nesta entrañable hestoria d’amistá basada en fechos reales ente’l músicu negru Don Shirley (Mahershala Ali) y el xofer italoamericano Tony Lip (Mortensen) que lu llevó de xira pel sur d’Estaos Xuníos a mediaos de los sesenta. “Ensin ti nun hai película”, dixo’l realizador, que tamién quixo recordar a l’actriz Carrie Fisher. Green Book yá se llevó’l premiu del públicu del festival de Toronto, trés Globos d’Oru y foi escoyida como’l meyor filme pol Sindicatu de Productores (PGA).

La favorita, de Yorgos Lanthimos, qu’optaba a otres diez estauínes, solo pudo materializar el premiu a la meyor actriz pa la británica Olivia Apinen, y foi una de les grandes derrotaes. Apinen, que borda’l papel de la reina Ana Estuardo nel primer filme de dómina del cineasta griegu, llogró arrampuñar el Oscar a la veterana Glenn Close, que partía como gran favorita pol so trabayu de muyer a la solombra d’un home que gana’l premiu Nobel de lliteratura en La bona esposa. L’actriz estadounidense nun pudo romper la racha de mala suerte nos Oscars tres siete nominaciones infructuoses.