Portada Lliteratura Grau inaugura esti xueves la Biblioteca de Poesía Asturiana

Grau inaugura esti xueves la Biblioteca de Poesía Asturiana

by asturnet

La Fundación Aula de les Metáfores va acoyer na so colección de llibros una importante Biblioteca de Poesía Asturiana, gracies a les aportaciones de la Conseyería de Cultura. Esti xueves, a les 19.30 hores na capiella los Dolores de Grau, va celebrase la inauguración d’esta iniciativa, cola presencia de Consuelo Vega, Directora de Política Llingüística; Antonio Rey, alcalde de Grau; Ángela Sánchez Vallina, presidenta del Gremiu d’Editores d’Asturies; y Fernando Beltrán, presidente de la Fundación. Pa pesllar l’actu van cantar los Hermanos Valle Roso, acompañaos al pianu por Xaime Arias ya interpretando cantares basaos en poemes d’autores asturianos.

La iniciativa súmase a la biblioteca de poesía catalana cola que yá cuntaba la institución moscona, gracies a la collaboración del Institutu Ramón Llul. La Biblioteca de Poesía Asturiana va sumar a los fondos yá esistentes na Aula, más de 300 volumes donaos pola Dirección Xeneral de Política Llingüística, que va siguir apurriendo dacuando exemplares a una colección que suma nesti momentu más de 400 y que va axuntar les referencies ineludibles de la poesía asturiana de tolos tiempos, dede Antón de Marirreguera a Antón García.

Van Compartir espaciu na Biblioteca los clásicos de la poesía asturiana como’l Padre Galo, Constantino Cabal, Teodoro Cuesta o Xuan María Acebal, los autores del Surdimientu, Xuan Xosé Sánchez Vicente, Manuel Asur, Xuan Bello, Berta Piñán, Antón García, Pablo Antón Marín Estrada, Lourdes Álvarez o Esther Prieto, y los más nuevos continuadores d’esa tradición, como Xandru Fernández, Vanessa Gutiérrez, Pablo Texón o Héctor Pérez Iglesias. La Biblioteca va poner a disposición de los llectores tamién les antoloxíes más importantes que se ficieron hasta la fecha, les principales traducciones y les revistes y demás publicaciones periódiques que recueyen amueses de poesía n’asturianu.

L’alcuerdu suscritu cola Conseyería de Cultura y Turismu contempla tamién la realización conxunta d’actividaes de promoción de la poesía asturiana. Nesi sentíu, destaca la collaboración de l’Aula de les Metáfores na próxima Selmana de les Lletres Asturianes, dedicada al escritor llangreanu Mánfer de la Llera. El 5 de mayu, a les 20:00 hores na Capiella los Dolores, trés poetes que se cunten ente los más representativos de les socesives xeneraciones del Surdimientu, Xuan Xosé Sánchez Vicente, Xuan Bello y Vanessa Gutiérrez, van lleer poemes propios y van esponer la so valoración de la obra y la figura del poeta homenaxáu.

Tamién te podria gustar