Gobiernu y Universidá defenden l’estudiu de Lorences y reiteren que la mayoría de titulaos nun emigra

Gobiernu y Universidá deféndense a sigo mesmos. L’Executivu autonómicu y la institución académica exaltaron güei el rigor del estudiu sobro emplegu ellaboráu en comuña por dambes instituciones y reiteraron que, acordies colos datos del informe, la mayoría de titulaos nun emigra fuera’l Principáu. El conseyeru d’Educación y Ciencia llama a estremar ente “emigración y movilidá”.

N’opinión de José Luis Iglesias Riopedre, nun ye lo mesmo tener que dexar la tierra propia por necesidá d’atopar un puestu de trabayu que plantegase esa marcha pa progresar profesionalmente. Nesti sen, el titular d’Educación entrugóse güei retóricamente pola capacidá’l mercáu llaboral asturianu p’absorber a tolos titulaos que salen cada añu de la Universidá d’Uviéu.

Pol so llau, el vicerrector de Coordinación, Santiago Martínez, avaló les conclusiones del estudiu y destacó la formación ufrida na Universidá como’l “gran activu” de la sociedá asturiana. Otra cosa ye ónde trabayen llueu esos mozos y moces formaos darréu qu’acaben los sos estudios, precisó.

Dende la so presentación, el pasáu 16 de febreru, l’informe coordináu pol caderalgu Joaquín Lorences provocó gran controversia nel collectivu de xóvenes emigraos, que s’amosaron especialmente molestos tres de conocer que’l presidente autonómicu, Vicente Álvarez Areces, aseguró al presentar el documentu que la emigración masiva de mozos y moces asturianos ye “una lleenda urbana”.

Según les conclusiones del informe universitariu, encamentáu y avaláu pol Principáu, sólo’l 23 por cientu de los llicenciaos y diplomaos na Universidá d’Uviéu emigra fuera d’Asturies a la gueta d’un puestu de trabayu, y dos de cada tres titulaos universitarios asturianos alcuentren emplegu nun plazu de dos años.

Archivu. Un estudiu de la Universidá conclúi que sólo la cuarta parte de los titulaos emigra d’Asturies por trabayu