García Arias ufre soluciones pa modelos formales de llingua na xornada inaugural del Congresu Internacional de Lliteratura

Xosé Lluis García Arias punxo munchos puntos sobre les “íes” más conflictives del procesu normativizador de la llingua asturiana, les que van a la gueta de modelos prestosos de llingua tanto nel planu lliterariu como nel de los medios de comunicación, na conferencia inaugural del Congresu Internacional de Lliteratura Asturiana que se desendolca nel salón d’actos del la Facultá de Filoloxía de la Universidá d’Uviéu. Arias entamó faciendo hestoria de los modelos lliterarios criticando a los que asitien l’entamu d’esos modelos nes dómines de la transición del sieglu pasáu, hai menos de trenta años.

El salón d’actos del campus del Milán d’Uviéu acoyó la so conferencia entitulada “De llingua y Llliteratura” cola que s’averó a les dificultaes cimeres de la llingua na comunicación d’anguaño y criticó delles ufiertes que se fain dende ámbitos lliterarios tracamundiando conceptos.

El programa del llunes completóse a les 19:30 hores cola actuación de la banda ribeseyana Corquieu.

Les xeres pa esti día 6 entamen dende bien tenpranu, a les 09:30 hores cola participación de Marcela Romano de la Universidá de Mar del Plata d’Arxentina que va falar sobre “L’orbayu nos llabios. Botas sobre la canción de autor asturiana”. Otros participantes n’esta primer sesión van ser Xandru Martino, Xosé Antón Fernández o José Enrique Gargallo.

El director d’Asturnews, Próspero Morán va pronunciar, durante la xornada del martes 6, una conferencia sobre comunicación embaxo’l nome “Periodismu cultural y lliteratura asturiana” a les 17:15 hores. Y el día va finar con una mesa redonda na que van participar Ana Vanessa Gutierrez, Pablo Texón y Berto García alrodiu del panorama poéticu asturianu.