Formientu llega al númberu 10 con 60 autores nes sos páxines

Esti llunes 16 d’abril de 2012, a les ocho la tarde, Formientu, revista lliteraria qu’axunta la obra d’autores mozos n’asturianu, va presentar el so númberu diez en Xixón, dempués de cinco años de camín andáu. El primer númberu de Formientu presentóse nel añu 2006 tamién en Xixón, dende entós vienen participando na revista más de 60 autores, menores de 30 años y qu’usen l’asturianu nos sos testos.

L’actu va celebrase na sede de la Sociedad Cultural Gijonesa, asitiada nel númberu 4 de la Cai Balmonte de Miranda, en Xixón. Nel actu van intervenir, el director de la revista, Inaciu Galán, miembros del conseyu de redacción de la revista, y los autores qu’apaecen nesti númberu, dando llectura a los sos testos.

La revista ta abierta a autores mozos de tol dominiu llingüísticu asturlleonés, y yá espublizaron testos autores de Lleón o Zamora, amás de dalgunos descendientes d’asturianos n’otros estaos d’Europa y América.

Nesti númberu apaecen poemes de Cristina Menéndez Martín (Mieres, 1984), Frantxu Melero (Avilés, 1987), Inaciu Galán y González (Xixón, 1986), Abel Aparicio González (Lleón, 1980), Alejandra Sirvent (Pravia, 1980), Fonsu Suárez Román (Xixón, 1991), Javier Cubero de Vicente (Xixón, 1986), Vítor Suárez Piñero (Uviéu, 1986) y rellatos de Suárez Piñero y Blanca Fernández Quintana (Bimenes, 1994), amás d’una crítica lliteraria de Denis Soria Fernández (Xixón, 1989).

Esti númberu de la revista, que sal agora al mercáu, ta a la venta na páxina web de l’asociación Xareos!, que la edita, www.xareos.com

Formientu aprovecha pa convidar a los autores mozos a unviar los sos testos al conseyu de redacción de la revista, col envís d’espublizalos. Pueden facelo nel corréu lletrónicu formientu@xareos.com