Firme apuesta de la Comarca de la Sidra pel Camín de Santiago

La Comarca de la Sidra vieno de dexar afitada la importancia estratéxica dientro del so llabor d’allugamientu como destín turísticu de referencia n’Asturies que tien el Camín de Santiago, Nuna nota de prensa asoleyada esti día, informa de qu’esta ruta de pelegrinación convirtióse nun elementu de desenvolvimientu económicu bien importante pa determinaes localidaes de la contorna sidrera, atrayendo cada añu a miles de visitantes, na so mayoría estranxeros.

Y por mor d’ello esta selmana axuntó un grupu de trabayu nel que s’integraben conceyales de turismu de los Conceyos de Colunga, Villaviciosa y Sariegu, asina como representantes de les asociaciones del Camín de Santiago de Villaviciosa, Siero-Noreña-Sariegu, y responsables del serviciu de promoción turística de la Mancomunidá Contorna de la Sidra. L’oxetivu d’esta xunta yera establecer llínees de coordinación y cooperación en tou lo rellacionao cola ruta Xacobea al so pasu pola Comarca de la Sidra, especialmente nestos momentos, nos que se ta a la espera de qu’en 2015 defínase la Unesco sobre la candidatura de “Los Caminos de Santiago del Norte peninsular” pa la so inclusión na Llista de Patrimoniu Mundial.

Esta llínea de coordinación ente los axentes implicaos nel Camín dexó establecer una serie d’iniciatives a llevar a cabu a lo llargo de los próximos meses, nes que s’atopen, ente otres, la puesta en marcha d’un protocolu de revisión añal del estáu de la ruta Xacobea pa llevar a cabu remanes de caltenimientu na mesma, la evaluación del estáu de los albergues municipales y la posibilidá d’executar trabayos de meyora y el fomentu de la creación de productos turísticos nel ámbitu empresarial amestaos al Camín, tal que se fixo va unos meses cola puesta en marcha de la ufierta d’agospiamientu denominada “Pase del Pelegrín na Comarca de la Sidra”, na que güei día participen casi una trentena d’establecimientos.

Con tolo enantes mentao preténdese que la ruta Xacobea pola Comarca de la Sidra conviertase nun Oasis nel Camín”, y que sía recordada ente tolos pelegrinos como un espaciu cuidáu y atopadizu pa, d’esta miente, fomentar que se convierta en “embaxadora” de la imaxe de la Comarca.