Esther Prieto publica una gramática usal pa escribir n’asturianu ensin duldes

Esther Prieto acaba de publicar ‘Gramática d’asturianu’, un manual prácticu d’usu de la llingua que surdió de la necesidá d’ufiertar una ferramienta útil y de fácil manexu pa solventar les principales duldes colos que s’atopa l’asturfalante mediu a la hora d’escribir. L’autora d’esti trabayu declaró a Asturnews que “al pesar de l’espardimientu del usu del asturianu n’ámbitos como los medios de comunicación o la lliteratura, cométense abondos errores alcuando de fácil solución”. Esta gramática usual “tenta ayudar a solventar esos erros y duldes frecuentes”.

Filóloga y escritora, Esther Prieto confiesa que’l trabayu recién publicáu nació más de la so esperiencia como correctora profesional nuna editora en llingua asturiana: “llevo tiempu afueyando y lleendo orixinales nos que ye habitual atopar soluciones bien estremaes en cada autor pa les mesmes coses, eso llevóme a pensar n’ofrecer un instrumentu al que se pudiera recurrir pa esos casos”. La gramática, publicada por Trabe -la editorial onde Prieto trabaya de traductora-, va destinada a tou tipu de falantes, inda “puede valir especialmente p’aquellos que desarrollen una actividá lliteraria o escriben nos medios de comunicación”, desplica Prieto.

Pa l’autora del manual los erros más frecuentes suelen venir motivaos polos clichés gramaticales y ortográficos del castellanu: “tengo observao que munches veces repítense calcos del castellanu seguro que d’avezu de manera inconsciente o automática, pongo por casu n’acentuación del “tu” pronominal o en delles soluciones non acordies col usu asturianu”. Otros erros avezaos son los tocantes a l’apostrofación: “xeneralmente col artículu “la” qu’a veces apostrófase cuando nun ye artículu y ta en función de pronome”.

La gramática usual d’Esther Prieto nun tenta competir con otres esistentes o la canónica de l’Academia de la Llingua: “quier ser un complementu prácticu d’esa obra de referencia imprescindible pero que nun ye de manexu fácil pa asturfalantes non habituaos al conocimientu filolóxicu”. Col oxetu de facilitar la so llectura por tou tipu de públicu el manual de Prieto ufierta numberosos exemplos prácticos y al final de cada capítulu un breve apartáu coles duldes más frecuentes.

Ensin ser especialmente optimista respective al futuru de la llingua asturiana como idioma socialmente normalizáu Esther Prieto reconoz “que güei hai un espardimientu del usu de la llingua asturiana n’ámbitos cada vez más amplios y a midida qu’avance esi usu van necesitase ferramientes práctiques como la que pretende ser esta gramática”. Les midíes programaes pola administración autonómica en política llingüística “pueden ayudar a esa normalización del usu social”, afirma Esther Prieto pa quien el Plan de Normalización apocayá aprebáu pol gobiernu asturianu: “ye un avance destacable en cuantes a que marca oxetivos y cuantíes concretes, puede favorecer l’espardimientu del usu del asturianu na sociedá” y lo que l’autora de ‘Gramática d’asturianu’ considera más importante: “a quita-y fierro y desdramatizar un asuntu como’l de la normalización de la llingua”.