Ésitu de públicu na presentación de la Tercer Antoloxía de cuentos curtios ‘El Garrapiellu’

Alborá Llibros, en Xixón, foi la llibrería escoyida pola editorial VTP y pola Tertulia Cultural ‘El Garrapiellu’ pa presentar la so tercer antoloxía de cuentos curtios, onde s’axunten los cuentos premiaos y los accésit de los últimos cinco años del Concursu de Cuentos Curtios n’Asturianu qu’entama esa asociación. La llibrería cuntó cola presencia d’una importante representación de persones de la cultura asturiana y de la sociedá xixonesa.

L’actu tuvo presidíu por Chema Vega d’El Garrapiellu y por Ánxel Nava, ilustrador del llibru, qu’aprovechó pa facer una “pefomance” col so personaxe ‘Mariquina Galana’. Los rellatos que s’inclúin nel volume son «El mercaderu» (Constantino Álvarez Delgado), «Pretéritu imperfectu» (Pablo Texón Castañón), «Les fíes de Miguel Xuan» (Quique Faes Díaz), «Paco depués del trauma» (Quique Faes Díaz), «De penalti» (Pablo Rodríguez Medina), «Sedna» (Iris Díaz Trancho), «Ente l’agua» (Pablo Texón Castañón), «Les tardes del tesoru», d’Héctor Pérez Iglesias, «El cementeriu de Lechatnoir» (Pablo Rodríguez Alonso) y «El plan (Friends forever)» (Pablo Rodríguez Medina).