Escoyíos los 5 vídeos finalistes del programa Ciencia y Tecnoloxía en femenín d’Avilés

Esti día foron escoyíos los 5 vídeos finalistes del programa Ciencia y Tecnoloxía en femenín d’Avilés ente 77 presentaos. Participaron más de 380 alumnos y alumnes y los trabayos, que yá tán disponibles en Youtube, planteguen soluciones a retos como la contaminación de les agües, la meyora del tresporte urbanu o la llimpieza de la Ría.

Cinco vídeos de cada unu de los centros de secundaria de la ciudá son los finalistes d’un total de 77 presentaos, toos ellos productu de la inspiración y el trabayu de 380 alumnos y alumnes que participaron na quinta edición del programa “Ciencia y Tecnoloxía en Femenín”, empobináu a fomentar l’estudiu de disciplines científiques y tecnolóxiques ente’l públicu xuvenil femenín.

Los cinco trabayos van ser evaluaos poles nueve científiques y tecnólogues que fueron les mentoras del alumnáu participante que’l so trabayu yera buscar soluciones a los retos plateados nel actu central celebráu’l pasáu 29 de payares nel Centru Niemeyer, toos ellos rellacionaos colos Oxetivos de Desenvolvimientu Sostenible (ODS) y que faíen referencia a la movilidá ciudadana sostenible, agua llimpio y retu demográficu nuna sociedá onde crez el númberu de persones mayores y la natalidá escai.

L’alumnáu participante cuntó col sofitu técnicu de profesionales especializaos en metodoloxíes d’acción rápida. Cada grupu de trabayu tuvo integráu por un máximu de 5 integrantes, lideráu por una alumna.

El proyectu ganador n’Avilés va asistir a la fase final del concursu que va tener llugar n’abril en Madrid, nes instalaciones del Parque Científicu de la Universidá Carlos III de Madrid, en Puerta de Toledo. Nos postreros cuatro años Avilés foi finalista, trés vegaes el IES Carreño Miranda, y el Colexu Santu Ánxel que resultó Campeón d’España de 2020.

De les 77 soluciones propuestes, resumíes en videos de dos minutos, los centros de secundaria escoyó como finalistes:

IES Nº 5 – Movilidá sostenible. ‘Bricks & Tickets’.

Tecnológa: Carla Álvarez.

La propuesta combina’l reciclaje y el tresporte públicu pa evitar la contaminación nes ciudaes.

IES Carreño Miranda – Acción pel agua: Agua llimpio y Saneamientu. ‘Clean Water’

Tecnólogues: Laura Miralles, Rocío Menéndez, Mónica Lozoya

Les alumnes plantegen ameyorar la llimpieza de les agües y l’aspeutu de la Ría d’Avilés utilizando preseos non contaminantes basaos na intelixencia artificial.

IES La Lluz – Acción pel agua: Agua llimpio y Saneamientu. ‘Aqualuz’.

Tenóloga: Mónica Lozoya

La propuesta consiste n’aforrar el consumu d’agua, evitar l’esbardie y reciclar l’agua basándose n’equipos intelixentes.

IES Menéndez Pidal – Acción pel agua: Agua llimpio y Saneamientu. ‘Los amigos de Willy’.

Tecnólogues: Beatriz Padilla, Mónica Lozoya y Lorena González

Un pexe robot, Willy, teledirigido y provistu de sensores pa detectar y destruyir refugayes nes agües too ello utilizando enerxíes anovables. Utilizando’l recicláu de les borrafes recoyíes como nichos d’empléu.

Colexu Salesianos – Acción pel agua: Agua llimpio y Saneamientu. ‘Manoplastic’

Tecnólogues: -Beatriz Padilla, Mónica Lozoya y Lorena González – https://www.youtube.com/watch?v=sPup3FvwQ0o

El so trabayu propón un inodoro intelixente que ye capaz de dixebrar les borrafes n’orixe colo que s’evitaría que desfechos desavenientes acaben nes depuradores y contaminen les agües y el mediu ambiente.