Entreguen los premios del VI Concursu Semeyes La Sidra

Esti sábadu 19 de xineru a les ocho la tarde, tendrá llugar la entrega premios del Vi Concursu Semeyes La Sidra y la inauguración de la esposición LA SIDRA ’13. La Sidrería La Galana tornará a ser el llugar escoyíu pa facer entrega de los premios d’esta sesta edición del Concursu Semeyes LA SIDRA y pa la inauguración de la esposición LA SIDRA ’13 formada poles venti semeyes esbillaes d’ente les cuasique 600 presentaes al concursu, que tará espuestu na mencionada sidrería xixonesa fasta’l fin de febreru.

El 1er premiu dotáu con 500 euros en metálico y 100 euros en llibros foi nesta edición pa la semeya “Cartel”, de Miguel Ángel Puente Cabrero; el segundu, dotáu con 350 euros, pa “Primer Mosto” de Carlos de Cos Azcona, y el tercer llugar, con 150 euros en premios, pa la semeya “Inmersión”, d’Óscar Chamorro Flórez.

Amás, el Premiu Especial J.R., dotáu con dos caxes de sidra d’esti llagar, pa la obra protagonizada por esta sidra, foi pa la semeya “Escanciado”, d’Óscar Chamorro Flórez.

A esta sesta edición del concursu presentárense 134 fotógrafos con 593 semeyes, de 18 naciones estremaes, “afitando entá más el so calter internacional”, espliquen dende la organización, que tamién destacó “la participación por primer vegada dende Australia, anque ciertamente la participación mayoritaria correspuende a Asturies, Madrid y el País Vascu”, aclarien.