Entamen les actividaes del VI Salón del Llibru Asturianu en Xixón

La sesta edición del Salón del Llibru Asturianu inaugurábase ayeri na cai Tomás y Valiente de Xixón y les actividaes entamen esta mesma mañana con un cuentacuentos a cargu de Beatriz Rato, a partir de les doce la mañana.

A la una la tarde Francisco Javier Fernández González va presentar los llibros “Asturias en imágenes: la imagen de nuestra tierra”, “Gijón en la mirada” y “Picos de Europa en la mirada”, asoleyaos pola editorial Picu Uriellu. Darréu va firmar exemplares a los asistentes.

Mañana domingu, Beatriz Rato vuelve a abrir el día col cuentacuentos. A la una la tarde, Alberto Álvarez Peña, etnógrafu y dibuxante, va lleer la conferencia “La mitoloxía asturiana” y va firmar dellos llibros de so asoleyaos pola editorial Picu Uriellu.

Yá pela tarde, y a partir de les 19:30, el cocineru Lluis Nel Estrada va dar la conferencia “Los quesos asturianos y el so papel na nuesa gastronomía”, firmando darréu dellos llibros de cocina de so. Dempués del actu y pa rematar el día va celebrase una preba de quesos asturianos y vinu de Cangas “Monasterio de Corias”, ufiertada por Coasa.

El llunes 25 va protagonizalu Xuan Xosé Sánchez Vicente cola presentación y firma de la so primer novela escrita en castellán “No miréis al mar”, asoleyada por Septem. L’actu va celebrase a les 19:30 hores.

El martes a les siete y media la tarde Javier García Cellino presentar “Círculos de tiza”, de la editorial Septem.

Cristina Muñiz, Azucena Álvarez, Isaac G. de l’Arada, Benxa Pérez, Chechu García ya Inaciu Galán, van presentar el llibru “¡Pa echar unes rises! Antoloxía de monólogu modernu”, coordináu y prologáu Galán. El llibru inclúi una esbilla de los meyores monólogos modernos xeneraos pol nuevu movimientu lliterariu que nos últimos años revitalizó’l xéneru, dende l’implusu de l’asociación Xareos!.

El xueves Esther García López va presentar “Faraguyas”, un llibru de haikus escritu pola escritora y académica valdesana y asoleyáu por Madú Ediciones.

El vienres 29, a les 19:30 hores Manolo Abad va presentar “Vasos Sucios En La Madrugada”, novela espublizada por Septem.

La última fin de selmana va venir protagonizada por presentaciones, firmes y recitales onde van participar autores como Miguel Rojo, Pablo Texón, David Rivas o José Luis Rendueles.