Entama la Selmana Cultural de La Salle de Xixón con una programación centrada nel asturianu

El Colexu San Eutiquio abre güei la so Selmana Cultural 2008, dedicada al llibru. El Conceyal d’Educación y Cultura xixonés, Justo Vilabrille y l’escritor Humberto Gonzali, van inaugura una a les doce y media la mañana una esposición bibliográfica, asina como un conxuntu d’actividaes que van a contar cola presencia de destacaos autores asturianos. Nel centru educativu asitiáu nel barriu xixonés de Cimavilla van abrise güei estes xornaes con un tiempu pa la reflexón dedicáu a “¿Por qué ye importante la llectura?”.

Mañana martes, la reflexón va titulase “El Cementeriu de los Llibros Escaecíos” y a les nueve y diez de la mañana va ser Aurora García Rivas, escritora en castellanu y gallego-asturianu, la qu’entame les charres con “Averándose a la poesía”. A les 11.00 hores pieslla’l día un “Conciertu didácticu de Música Tradicional”, con Daniel García de la Cuesta , miembru del grupu folk Lliberdón, investigador, concertista y conferenciante de temática tradicional.

El miércoles 23 la reflexón va xirar alredor de “Pa entender matemátiques ha lleese”. Y a les 11.00 hores entama la xornada de conferencíes con “L’humor gráficu y el Cómic n’Asturies” con Ernesto García del Castillo “Neto”, dibuxante y humorista gráficu de La Voz de Asturias, pa zarrase dempués, a les 12.30 hores, cola conferencia “Cómo llegar a ser empresariu cultural “, con Inaciu Iglesias, empresariu, editor y escritor.

El xueves 24 entama cola reflexón “Carta a un neña que nun quier lleer”. A les once la mañana l’escritor y presentador de la TPA y la Cadena SER, Inaciu Galan y Gonzalez, va entamar una charra titulada “Facer televisión n’asturies”, na que va poder vese un documental preparáu por alumnos del centru y pol propiu autor a costafecha pa la ocasión y nel que se pue ver el procesu de realización del so programa de la TPA, “Al Aldu: Xente de Casa”. Esi mesmu día, a les doce y media la mañana escritor, etnógrafu, dibuxante ya ilustrador Alberto Álvarez Peña va falar de los “Mitos del Conceyu de Xixón”.

L’últimu día de la selmana cultural va abrise con una reflexón sobre “Los llibros…”, a la que va siguir, a les 11 hores una segunda sesión de la charra d’Inaciu Galán “Facer televisión n’asturies”, que va repetir la charra del xueves pa dellos alumnos más del centru.