Enric Estarli, con “Echando”, gana’l Concursu de Semeyes de La Sidra

Esti pasáu 21 de xineru axuntó’l xuráu del Concursu de Semeyes La Sidra pa deliberar y dar el so fallu sobro les obres presentaes al certame, que ganó a lo postrero’l fotógrafu Enric Estarli cola obra “Echando”.

La cita tuvo llugar nes istalaciones de la Fundación Asturies XXI. El tribunal tuvo compuestu por: Natalia Alonso Arduengo de la Galería Aurora Vigil-Escalera; Carlos Suárez Alonso de l’Asociación Asemeyando; Alberto Otero Antuña, fotógrafu profesional; y Luis José Vigil-Escalera de la Confederación Estatal de Fotografía –CEF–.

Los cinco integrantes esaminaron les 207 semeyes procedentes de los 61 participantes, tres votación votación individual, simultánea y secreta decidieron que la fotografía ‘Echando’ d’Enric Estarli recibiera’l primer premiu y medaya d’oru de la CEF; en segundu llugar y medaya de plata de la CEF quedó ‘8 mazanes’ de Bosco Mercadel; finalmente, el tercer puestu y medaya de bronce de la CEF ocupar Glendor Díaz Suárez con ‘La vieya caxa de sidra’. Amás la Mención Especial JR y Dipolma de la CEF otorgóse-y a Antonio Alcázar Ojeda pola imaxe ‘Una de sidra por favor’. El restu les semeyes clasificaes puen consultase na nuesa páxina de Facebook.