El xuráu del Premiu Timón 2007 va aconceyar esta selmana pa decidir el ganador

L’Asociación L’Arribada convocó nel mes de xunetu un nuevu premiu col envís de facer reconocencia de la trayectoria lliteraria y/o’l llabor de promoción de la lliteratura asturiana d’un autor de la nuesa lliteratura mayor de cincuenta años y con una carrera lliteraria importante, el Premiu Timón. El plazu pa presentar candidatures terminó esti sábadu pasáu y esta selmana va aconceyar el xuráu conformáu pola asociación ente persones de la lliteratura y la cultura asturiana d’estremaes sensibilidaes y dedicaciones.

El xuráu va tar formáu pol filólogu y académicu de la Llingua, Ramón d’Andrés, pol escritor miembru de l’Academia de la Llingua Asturiana, David M. Rivas, pol editor y escritor Milio Rodríguez Cueto, pol escritor y xestor cultural Humberto Gonzali y pola escritora Aurora García Rivas, teniendo como secretariu con voz pero ensin votu a Inaciu Galán y González, presidente de l’Asociación L’Arribada, director de la revista lliteraria ‘Formientu’y presentador de la TPA.

El premiu pal ganador, escoyíu pol xuráu d’ente les candidatures presentaes por persones individuales y coleutivos, va ser una escultura del artista Ánxel Nava, que va entregase’l próximu día 21 de setiembre a les seis y media y dientro de los actos de l’Arribada 2007. Momentu nel que va conocese quién ye’l ganador d’esta primer edición.