El Xanu’l Caborniu, ganador absolutu de los Premios al Meyor Blogue n’asturianu 2009

El blogue tituláu “El Xanu’l Caborniu” fízose coles dos reconocencies que taben en xuegu na segunda edición del meyor blogue en llingua asturiana, algamando’l primer puestu nel blogue con meyores conteníos, con 59 puntos, y na votación a la meyor estética o meyor diseñu, con 8. En segundu y tercer puestu quedaron, respectivamente, “La verdá ye mentira”, con 45 apoyos; y “González y González”, con 36 votos.

Los resultaos decidiéronse democráticamente por tolos blogueros n’asturianu que quixeron mandar un corréu colos sos votos, dientro les bases de la convocatoria’l meyor blogue de 2009. Dientro’l II Sidra&Blogues que se cellebrará’l 20 de febreru na Casa los Alberti de Ciañu (Llangréu), de magar les 17 hores, habrá una entrega de premios pa reconocer el trabayu fechu polos blogueros seleccionaos.

Los ganadores van recibir un llote cedíu por Softastur y el LoCo Team Asturianu consistenete en 4 CDs orixinales de la cabera versión d’Ubuntu 9.10, mientres que Xareos! Xestión Cultural va ceder tamién dellos exemplares del últimu númberu de la revista Formientu, el seis.

La organización quixo dar les gracies “a tola xente que nos sofitó, participando y espardiendo la idea, a los que vos pusisteis en contautu con nós pa ofrecenos la vuesa ayuda y a los que participasteis activamente”. Les votaciones d’esti añu tuvieron entamaes polos blogueros de La Esfoyaza y TrayasgayA cola collaboración de marquinos y González y González.