El Proyeutu de Decretu qu’afita los niveles de competencia de la llingua asturiana yá ye realidá

El Proyeutu de Decretu qu’afita los niveles de competencia de la llingua asturiana yá ye realidá y l’Academia de la Llingua Asturiana treslladaba darréu la so felicitación a la Conseyería de Cultura pola acabación d’esti Proyeutu de Decretu nel que s’afiten los niveles de competencia nel usu de la llingua asturiana y pidía al tiempu que se faiga lo mesmo col gallego-asturianu.
L’Academia de la Llingua Asturiana (ALLA) fixo llegar nel día de güei la so felicitación al Direutor Xeneral de Planificación Llingüística y normalización, D. Fernando Padilla Palicio, pola «acabación del Proyeutu de Decretu nel que s’afiten los niveles de competencia nel usu de la llingua asturiana, acordies coles llinies que fixa’l Marcu Común Européu de Referencia pa les Enseñances Llingüístiques».

Nella, tamién se diz que «aguarda l’Academia que los trámites previos nun s’allarguen nel tiempu y que’l Decretu vea la lluz bien llueu, de mou que los asturianos y asturianes a los que-yos pruya puedan acreitar el so nivel de competencia n’asturianu con calter oficial».

Del mesmu mou, l’ALLA, que ye sabedora de lo complexo d’un procesu asemeyáu, afala a la Conseyería a ver «la posibilidá de que s’entame’l trabayu que lleve a fixar los niveles llingüísticos del gallego-asturianu. Ello sedría especialmente importante pa la dignificación de la llingua eonaviega y pa da-y valir al so conocimientu ente los ciudadanos asturianos del Navia-Eo». En tou casu, nesti llabor podría cuntar dafechu col sofitu de la Secretaría Llingüística del Navia-Eo