El proyectu pa Tito Bustillo queda fuera de los presupuestos xenerales del Estáu

El gobiernu español destina a la comunidá autónoma asturiana 3.450.000 euros pa infraestructures culturales nel exerciciu de 2005 dientro los presupuestos del Estáu. L’aportación de l’administración central empobínase a proyectos consideraos prioritarios como l’ampliación del Muséu Arqueolóxicu, l’Archivu Hestóricu y la remocicación del monesteriu de Curniana. Nos presupuestos nun s’inclúi dala partida pal proyectu de Tito Bustillo que queda aparcáu hasta concretase dafechu.

Nos presupuestos xenerales del Estáu elaboraos pol gobiernu central inclúense partides pa otres actuaciones en materia d’infraestructures culturales como la remocicación del monesteriu de Valdediós o la del Palaciu Hevia de Villaviciosa. Pa la cueva de Tito Bustillo y el so entornu nun apaez conseñada nenguna cantidá, posponiéndose les partíes necesaries hasta l’algame d’un proyectu consensuáu.

El proyectu pal xacimientu prehestóricu de Ribesella vien arrastrando una fonda carga polémica dende que se punxo enriba la mesa y tuvo los sos momentos más críticos nel enfrentamientu de postures ente l’administración asturiana y l’anterior ministru de Fomento.

Les dificultaes de llevar a cabu un proyectu pa Tito Bustillo que respuenda a los deseos del conceyu riosellanu vienen motivaes pola intención prioritaria del gobiernu del Principáu de construir un muséu de la prehestoria en Teverga. Los planes del Principáu fueran contestaos con sucesives movilizaciones ciudadanes en Ribesella.