Portada Conceyos El programa d’Ociu Xuvenil d’Uviéu inclúi más de cien actividaes esti semestre

El programa d’Ociu Xuvenil d’Uviéu inclúi más de cien actividaes esti semestre

by redacción asturnews

La conceyala de Mocedá, Covadonga Díaz, presentó esta selmana la programación de les actividaes d’ociu xuvenil d’esti semestre d’anguaño 2023. Acompañó a la conceyala Arancha Fernández, directora de la Área de Prevención de la Fundación CESPA-Proxecto Home.

“Ociu Xuvenil d’Uviéu ye un programa de prevención universal que pretende ser una iniciativa integral que, tomando como referencia estratexes educatives y xeneradores d’alternatives d’ociu, engloba distintes actuaciones que se desenvuelven nel ámbitu del ociu y tiempu llibre xuvenil, dende una perspectiva de promoción de la salú y de xeneración d’estilos de vida saludables”, indicó Díaz, que tamién dio datos de participación nel programa mientres l’añu pasáu: “Llevase a cabu un total de 321 actividaes d’ociu dirixíes a menores y nuevos, distribuyíes n’actividaes de fin de selmana, actividaes en distintos periodos de vacaciones escolares, y talleres. Fueron 18 les entidaes, clubes y fundaciones ensin ánimu d’arriquecimientu del Conceyu encargaes del so desenvolvimientu en collaboración col equipu técnicu del Programa. La participación alcanzada a lo llargo de tol añu foi de 8.515 participaciones (4.116 d’homes y 4.399 de muyeres). Esti datu supera llargamente la participación llograda los años 2020 (907) y 2021 (2.040), años nos que’l desenvolvimientu de l’actividá presencial viose atayáu o llindáu por cuenta de les restricciones sanitaries producíes pola COVID-19. Los datos de participación superen inclusive a los de 2019 (8.260), siendo los meyores datos de participación de los postreros cuatro años”.

La responsable municipal de Mocedá tamién sorrayó “la continuidá d’acciones d’información y sensibilización en redol al Día Mundial ensin Tabacu, Día ensin Alcohol, Día Mundial de la Salú y Día Mundial del SIDA coles mires d’informar y sensibilizar a la población xuvenil sobro l’adopción d’estilos de vida saludables. Tamién se realizaron esti tipu d’acciones n’otres feches señalaes, como son el Día Internacional de la Muyer, el Día Internacional de la eliminación de la Violencia de Xéneru, y el Día Internacional del Llibru que promueve el fomentu de la llectura nos mozos. Nes actuaciones presenciales venceyaes a estes iniciatives algamóse xuna participación de 581 persones, 240 homes y 341 muyeres, ente qu’al traviés de les redes sociales túvose un algame de 40.739 persones”.

Coles mesmes, indicó Díaz, “siguióse espublizando información sobro recursos gratuitos d’ociu saludable al traviés del Blogue Ociu Xuvenil que recibió un total de 1.292 visites a lo llargo del añu, y atendióse un total de 508 demandes dende’l serviciu d’información y asesoramientu”. Mientres 2023, anunció la edil, “24 entidaes ensin ánimu d’arriquecimientu van participar nel desenvolvimientu de les actividaes d’ociu. En total, tiense previstu desenvolver mientres el primer semestre del añu 102 actividaes, dirixíes a dos franxes d’edá estremaes, 12 a 17 años y 18 a 35 años”.

Como novedaes al respective de esti tipu d’actividaes destacó la programación de nueves actividaes d’ociu “como Cocina suah.ili, Llanzamientu de dardos, Iniciación al pádel, Alcuentru llingüísticu, Cocina senegalesa, Pilates, Iniciación al cosplay, Bailles rexonales, según la recuperación d’actividaes que llevaben dellos años ensin ufiertase como Jiu-jitsu, Fútbol sala, Crochet, Esgrima histórica y Rol. Ta programáu tamién llevar a cabu, en collaboración col Plan Municipal sobro Drogues y otres Adicciones, xuna campaña en redol a la celebración del Día ensin móvil, el 2 de marzu”.

Aránzazu Fernández facilitó más información sobro esta nueva programación de les 102 actividaes que van llevar a cabu 24 entidaes ensin ánimu d’arriquecimientu del conceyu d’Uviéu.
Axúntase programa y audiu.

DOSSIER PRENSA.pdf (pdf 256,9 kB )

 

 

Tamién te podria gustar