El Principáu propón que la UNESCO reconoza’l Camín del Norte a Santiago como patrimoniu de la humanidá

La conseyera de Cultura del gobiernu del Principáu, Ana Rosa Migoya, propunxo esti martes 10 en Santiago de Compostela, na reunión del Plenu del Conseyu Xacobéu, que s’estudie pidir a la UNESCO la reconocencia como Patrimoniu de la Humanidá al Camín del Norte. Anguaño namás ta reconocíu como talu el llamáu Camín Francés.

Migoya declaró tres l’aconceyamientu en Santiago colos responsables de Cultura de les comunidaes del Camín y cola ministra Carmen Calvo, que la solicitú a la UNESCO va ser ún de los asuntos a tratar nel cume ente los executivos asturianu y gallegu del prósimu 30 de xineru. Según la conseyera del Principáu, la comunidá vecina participa d’esta iniciativa y amuesa’l so apoyu a la mesma.

Ana Rosa Migoya espunxo na reunión de Santiago les actuaciones entamaes el pasáu añu 2005 nel Camín de Santiago al so pasu per Asturies, un conxuntu de llabores que la conseyera cifró en más de dos millones d’euros. La responsable autonòmica de Cultura anunció que ye intención del so departamentu siguir apostando pola promoción de la ruta xacobea na nuestra comunidá.