El Gobiernu de Galicia comprométese a unvia-y al Principáu una copia del plan pa espardir el gallegu

El Gobiernu de Galicia unviará-y al so homólogu asturianu información oficial sobro’l plan pa normalizar el gallegu, un documentu que prevé reforzar l’usu d’esti idioma nel occidente asturianu. La Dirección Xeneral de Política Llingüística de la comunidá vecina respondió yá por carta a la misiva que’l Principáu -y empobinara pa demandar una copia’l plan gallegu de normalización.

D’esti mou, el departamentu llingüísticu del Gobiernu de Galicia, que dirixe Xesús Pablo González Moreiras, remitió-y a la Conseyería de Cultura, Comunicación Social y Turismu del Principáu una carta fechada en Santiago de Compostela el pasáu llunes 13 d’avientu na que les autoridaes de la comunidá autónoma vecina comprométense a unviar darréu una copia oficial del ‘Plan xeral de normalización da lingua galega’, el primer documentu normalizador con que se dota Galicia depués de más de 20 años y que foi aprobáu hai agora tres meses.

De sutaque’l documentu aporte a Uviéu, los responsables de Cultura esaminarán con especial procuru los puntos del testu que cinquen al tratamientu del idioma gallegu nel occidente d’Asturies y emitirán un xuiciu al respective, si bien fontes de la Conseyería avanzaron güei que la propia conseyera, la socialista Ana Rosa Migoya, piensa yá en remiti-yos una comunicación a les autoridaes gallegues, previsiblemente p’afitar la competencia esclusiva’l Principáu nes polítiques llingüístiques desendolcaes na comarca asturiana del Navia-Eo.

El cruce de cartes ente los Gobiernos gallegu y asturianu supón la primer comunicación oficial ente dambes instituciones depués qu’una denuncia pública de l’Academia de la Llingua Asturiana alertara, el pasáu 22 de payares, de que’l plan de normalización del gallegu prevé, ente otres midíes, retular los comercios del Navia-Eo en gallegu, “faciendo visible que tán nun territoriu de llingua y cultura gallega”; alitar la enseñanza de y en gallegu en tolos centros públicos de la comarca; algamar una “perfecta” sintonización de la televisión pública gallega nel occidente asturianu, y da-y puxu al idioma gallegu nel usu familiar.

A esti choque d’intereses hai que-y amestar un segundu episodiu: El nomamientu, por parte de l’Academia de la llingua gallega, de Carlos Varela como delegáu d’esa institución pal “gallegu esterior” faláu nel occidente asturianu. Na so toma de posesión, el pasáu sábadu, Varela sorrayó la “incomprensión” de los falantes de gallegu en tierres eonaviegues.

Archivu. L’Academia de Galicia plantega crear un centru propiu de normalización con competencies nel Navia-Eo