Portada Tecnoloxía El Gobiernu d’Asturies va crear una rede propia d’espardimientu de la TDT en tol territoriu del país

El Gobiernu d’Asturies va crear una rede propia d’espardimientu de la TDT en tol territoriu del país

by asturnet

L’apagón analóxicu pal espardimientu de la señal de la Televisión Dixital Terrestre (TDT) va facese n’Asturies y nel restu de les comunidaes de manera progresiva pa culminar el procesu n’abril de 2010 algamando los mesmos niveles de cobertura que cola señal analóxica. Asina informó estos díes el Secretariu d’Estáu de Telecomunicaciones y Sociedá de la Información, Francisco Ros Perán, na conferencia sectorial celebrada en Madrid y a la qu’asistió la Conseyera d’Alministraciones Públiques y Vocera del Gobiernu del Principáu, Ana Rosa Migoya, qu’acudió acompañada pol Director Xeneral de Modernización, Alberto Pérez Cueto.

La Conseyera espunxo les especiales condiciones orográfiques y de población disperso d’Asturies, que fueron reconocíes pol Secretariu d’Estáu como factores que compliquen el procesu d’implantación de la TDT. Pa garantizar que la práctica totalidá de la población reciba la nueva señal dientro de los plazos establecíos, el Gobiernu del Principáu va construyir una rede propia con una inversión de 35 millones d’euros que van ser apurríos pol Ministeriu d’Industria al través de la secretaría d’Estáu de Telecomunicaciones y pa la Sociedá de la Información por aciu d’un préstamu a quince años sin intereses. Esti conveniu col Ministeriu va ser aprobáu’l xueves próximu na xunta del Conseyu de Gobiernu, según esplicó la Conseyera, y el mes de setiembre próximu, va firmase en Madrid.

La rede nueva, amás de ser soporte pal tresporte de la señal de TDT, dexa l’espardimientu de la señal de servicios de seguridá y emerxencia asina como la estensión de la Banda Ancho a zones rurales como complementu al Plan d’Estensión de Banda Ancho (PEBA) del Ministeriu.

“L’ayuda del Ministeriu espeya una y bona más el compromisu del Gobiernu de Zapatero con Asturies y la reconocencia del esfuerciu fechu y previstu pol Principáu pa que tolos asturianos tengan igualdá d’accesu a la señal de TDT”, señaló Ana Rosa Migoya.

El Plan Técnicu Nacional de TDT esixe que los operadores nacionales de radiodifusión algamen en 2010 cobertures del 96% (privaos) y 98% (públicos), anque éstes son de cómputu estatal. Nel casu d’Asturies, la orografía y la población disperso disparen los costos y dificulten que la iniciativa privada llegue a tolos sitios. Migoya recordó que’l Principáu pa llevar la TDT a la mayor parte d’Asturies va tener qu’adaptar con fondos públicos 300 de 360 centros reemisores.

“Queremos evitar dos realidaes n’Asturies: una zona adaptada y otra con dificultaes bultables p’acceder a estos servicios”, esplicó la Conseyera que quier que la cobertura dixital seya absoluta n’Asturies. Nesi sen, el mes de setiembre próximu va celebrase un aconceyamientu en Madrid pa buscar una solución al 1 por cientu de la población que nunca goció de cobertura televisiva. Pa ello baráxase usar la recepción vía satélite.

Tamién te podria gustar