El gobiernu asturianu plantea-y al Conseyu Consultivu les cuestiones de la oficialidá y la nacionalidá

El documentu aprebáu esti martes 24 pol Conseyu de Gobiernu del Principáu alrodiu de la reforma del Estatutu p’Asturies pon enriba la mesa cuestiones como la posibilidá de denomar nacionalidá a la comunidá autónoma, el desarrollu lexislativu en materia llingüística y el blindaxe de les llendes territoriales, ente otros asuntos. Agora’l Conseyu Consultivu habrá estudiar estes propuestes y emitir un dictame sobre elles.

L’executivu autonómicu quier saber les consecuencies xurídiques que puede tener la denominación d’Asturies como nacionalidá o al través d’otra fórmula asemeyada del so calter de comunidá hestórica. El gobiernu tamién busca saber les consecuencies de desarrollar l’actual llexislación en materia llingüística ensin refugar la oficialidá. Estes cuestiones xunto al blindaxe de los llendes de la comunidá énte los posibles intentos “espansionistes” d’otres comunidaes son delles de les cuestiones que plantea el documentu aprebáu nel últimu Conseyu de Gobiernu y que dio a conocer esti martes 24 la conseyera de Cultura y portavoz del executivu, Ana Rosa Migoya, acompañada de la conseyera d’Izquierda Xunida-Bloque, Laura González.

El gobiernu que preside Vicente Álvarez Areces daba asina’l primer pasu hacia l’entamu de la reforma estatutaria. Agora’l Conseyu Consultivu habrá estudiar el documentu y emitir un dictame sobre les cuestiones a camudar. Si se cumplen los plazos previstos, según el deséu de los partíos coaligaos nel executivu, PSOE ya IX-BA, la reforma podía tar rematada d’equí a un añu.