Portada Sociedá El Garrapiellu rescata nes sos olimpiaes el bolu rodáu federáu, única modalidá na que xueguen muyeres

El Garrapiellu rescata nes sos olimpiaes el bolu rodáu federáu, única modalidá na que xueguen muyeres

by asturnet

Más y meyor deporte. La tertulia cultural El Garrapiellu cellebrará’l prósimu fin de selmana nel recintu’l Pueblu d’Asturies, en Xixón, la so VIII Olimpiada de xuegos y deportes tradicionales, una edición que permite alquirir pa la ciudá una bolera pública de batiente y que rescata como federáu el bolu rodáu, la única modalidá na que compiten muyeres.

Asina, l’apuesta d’El Garrapiellu polos bolos tradicionales asturianos traduciráse na recuperación d’un recintu de xuegu pa la especialidá de batiente depués qu’una reforma’l Pueblu d’Asturies dexara al muséu ensin esa instalación: El Patronatu Deportivu Municipal comprará una bolera desmontable que la entidá cultural xixonesa llocalizó y prevé allugala como cancha de xuegu de calter permanente.

Con esa alquisición, al Muséu Etnográficu del Pueblu d’Asturies faltará-y namás una instalación de la modalidá de bolu palma pa contar con recintos de xuegu específicos pa les cuatro grandes especialidaes de bolos asturianos: celta, cuatriada, rodáu y palma.

Ente les novedaes previstes na octava edición de les olimpiaes entamaes por El Garrapiellu figuren amás la inclusión por primer vegada de la patefa de Meredo, llocalidá d’A Veiga d’Eo dende la que se desplazarán a Xixón cinco xugadores d’esi deporte casi desapaecíu; y un nuevu intentu de superar el ‘record Guiness’ de tiru con gomeru.

Tamién te podria gustar