El Conseyeru de Mediu Rural ve necesario protexer los recursos zooxenéticos autóctonos

El Conseyeru de Mediu Rural y Pesca señaló na so intervención nel 7u Congresu Ibéricu sobre Recursos Xenéticos Animales, que la Conseyería tien un “fuerte compromisu” na conservación de la biodiversidá ganadera y qu’esi compromisu concrétase en diverses midíes de sofitu, “tanto a los ganaderos que caltienen animales de races autóctones, como a les asociaciones de criadores responsables de desendolcar los programes de conservación d’estes races”. “Les nueses races autóctones asturianes constitúin un patrimoniu d’una riqueza incalculable tanto dende’l puntu de vista económicu, como social, medioambiental o de recursos xenéticos”, añadió Martín.

El Conseyeru tamién apuntó que’l Serviciu Rexonal d’Investigación y Desarrollu Agroalimentariu (SERIDA) ta desendolcando un programa de conservación “ex situ” col establecimientu d’un bancu de recursos zooxenéticos. Martín participó nel actu inaugural del 7u Congresu Ibéricu sobre Recursos Xenéticos Animales que se celbró la selmana pasada nel recintu de Feries y Esposiciones d’Asturies “Luis Adaro” en Xixón.

Esti Congresu aconceyó a científicos, profesionales, estudiantes y a les persones que trabayen o tán interesaes nos recursos zooxenéticos, tratándose aspeutos de la so carauterización xenética y demográfica, morfolóxica y productiva; programes de conservación (teunoloxíes reproductives y esquemes de seleición) y el so desendolcu sostenible pente medies de los productos certificaos, ente otros. Al empar, búscase que seya un foru que contribuya al espardimientu de les novedaes nes téuniques de conservación y carauterización de los recursos zooxenéticos, que puean ayudar al caltenimientu de la mayor diversidá xenética posible y de les nueves formes d’aprovechamientu de los recursos zooxenéticos, posibilitando l’averamientu de grupos de trabayu.Paralelamente a los acontecimientos científicos del Congresu d’ámbitu internacional desendolcóse la feria agroganadera AGROPEC, onde aconceyaron cerca de 500 espositores, procedentes de sectores como la ganadería, l’agricultura, la pesca, la industria alimentaria, los bienes d’equipu pa la esplotación agroganadera y pa les industries tresformadores, l’artesanía y otres alternatives a les actividaes agraries y ganaderes.