El Conceyu d’Uviéu presenta la campaña ‘Muévenos el respetu’ pa promover l’usu de la bicicleta

El Conceyu d’Uviéu, al traviés de la conceyalía d’Urbanismu y Mediu Ambiente que dirixe Ignacio Fernández del Pandorial, presentó esta mañana, en rueda de prensa, la campaña ‘Muévenos el respetu’, “una iniciativa de sensibilización social que pretende incentivar l’usu de la bicicleta como’l modelu de desplazamientu más sostenible ya incidiendo nos encamientos y normes de convivencia ente ciclistes urbanos y el restu de vehículos y peatones”.

El conceyal Fernández del Pandorial dexaba claro que “toles actuaciones lleváronse a cabu dende la conceyalía de Mediu Ambiente y Urbanismu y en collaboración cola de Seguridá Ciudadana y el so departamentu de movilidá”. Coincidiendo cola celebración del Día Mundial de la Bicicleta, el responsable municipal d’Urbanismu presentó al pie de representantes de Asturies ConBici, Ana Reyero y Carlos Texo, y l’intendente de la Policía Local, Francisco Goilón, una serie de materiales d’espardimientu (cartelos, dípticos, valles n’autobuses) que nes próximes selmanes van partir por tol conceyu.

La campaña ‘Muévenos el respetu’, sorrayó’l conceyal, “pretende recordar a conductores, peatones y ciclistes les normes básiques que regulen una meyor convivencia ente tolos sistemes de tresporte. El respetu a la distancia de seguridá de 1,50 metros ente vehículos y bicis, la prohibición de que les motos circulen pol carril bici y el respetu al carril 30 son dalgunes de les indicaciones que figuren nel dípticu que se va partir na marcha ciclista que Asturies ConBici entama la última fin de selmana de cada mes n’Uviéu”.

Ana Reyero, de Asturies Con Bici, esplicó qu’esta marcha, “abierta a tol públicu ciclista que lu deseye ye la XVI En bici per Uviéu, la primera d’esta temporada. A les 11.45 hores ta prevista una concentración con tolos participantes, que van partir dende La Llosa, pa realizar el percorríu de pocos kilómetros poles cais uvieines. El final de la marcha va ser, previsiblemente, nel Paséu de los Álamos, nel Campu San Francisco”.

Dientro de les campañes de sensibilización que la conceyalía d’Urbanismu y Mediu Ambiente desenvuelve dientro de les sos propies oficines “estos díes colgará una banderola pa promocionar l’usu respetuosu de la bicicleta como mediu de tresporte, unu de los vehículos más sostenibles”, concluyó’l responsable municipal de la área, Ignacio Fernández Del Pandorial.