El Conceyu d’Uviéu ellabora un estudiu que cataloga los 127 núcleos rurales del conceyu

El Conceyu d’Uviéu cunta per primer vegada con una catalogación de los núcleos rurales y les parroquies del conceyu, xuna ferramienta de trabayu fundamental pa realizar meyores na redolada, impulsar actuaciones y estudios de protección.

El documentu “Estudio y valoración del suelu rural centráu nos núcleos rurales y los sos ámbitos d’influencia” foi redactáu por un equipu de cuatro profesionales (el xeógrafu Jose Manuel Fueyo, el topógrafu Alberto Grande, l’arquiteutu Carlos Rei y Jose Manuel Alonso, llicenciáu en ciencies ambientales) que desenvolvieron el trabayu mientres un añu, ente abril de 2016 y marzu de 2017.

La resultancia final del trabayu ye un informe qu’enceta les 30 parroquies del conceyu, con un total de 127 fiches de núcleu qu’inclúin o algamen hasta un total de 191 entidaes de población rexistraes.

De cada unu de los núcleos rurales ellaboróse xuna ficha na que se señala, ente otros, la so situación básica nel conceyu, la so relación territorial col conxuntu d’asentamientos, les característiques físiques básiques de la redolada más inmediata (topografía, vexetación, hidrografía) y del espaciu construyíu, según aquellos otros datos o elementos de la so estructura que tienen dalgún interés singular. Como interés, el redactores del informe detectaron venti núcleos rurales más que nun taben catalogaos y agora va haber qu’analizar si s’inclúin con esta categoría al inventariu municipal. Llama l’atención que dalgún d’ellos, como Pereda, n’El Condáu, nun esistía nin siquier a nivel de planiamientu urbanísticu.

L’estudiu establez xuna valoración de los núcleos rurales en función del so grau de caltenimientu, nel que se valoren aspeutos como l’espaciu construyíu, la redolada natural y los usos agrarios o ganaderos del mediu, ente otros aspeutos. D’esta miente, en base a esta catalogación, el núcleu de Les Quintanas, na parroquia de Box, sería’l pueblu d’Uviéu meyor calteníu. Sígen-y nesti curiosu ranking les localidaes de Perlavia, en Trubia, y Pando, na parroquia de Caces. Los redactores valoraron cola puntuación más alta la preservación morfolóxica del conxuntu, el valor etnográficu, hestóricu y antropolóxicu, el paisaxe y l’integración del núcleu na so redolada.