El CMX acueye’l pieslle del III Cursu d’Asturianu en Xixón

Iniciativa pol Asturianu, el Conceyu Universitariu pol Asturianu (CUPA) y l’Academia de la Llingua Asturiana (ALLA) van entregar los diplomes acreitativos del III Cursu d’Asturianu en Xixón esti martes 5 de febreru a partir de les 19 hores, nel Salón d’Actos del Conseyu de la Mocedá de Xixón (Avenida Manuel Llanez 68, baxu), cola participación de los alumnos, que van dar llectura a dellos testos, tocar dalgunos instrumentos y hasta ver dalgunos vídeos d’alumnos que siguieron el cursu a distancia dende l’estranxeru. Nel actu van participar tamién, representantes de les asociaciones y Xosé Antón González Riaño, miembru de l’Academia, que va dar los diplomes a los más de trenta alumnos inscritos, ente presencial y a distancia.

Los organizadores califiquen de “mui positivamente” esta esperiencia formativa que llega yá a la so tercer edición y que tien siempres una perbona acoyida. Nesta ocasión cuntóse con alumnos de fuera d’Asturies, en países como Suiza, Méxicu, Paraguái o Xapón, y que según espliquen “son yá verdaderos embaxadores de la llingua asturiana pel mundu”. Dalgunu d’ellos participará nel actu de pieslle al traviés de cámara web.

Nel cursu presencial participaron estudiantes, persones de distintes profesiones, y procedencies, como un alumnu estremeñu y una catalana que dempués de venise a vivir a Asturies quixeron conocer y poder usar la llingua del país.