El Campu San Francisco va estrenar señalización accesible

El Campu San Francisco va estrenar señalización accesible anguaño con un proyectu qu’inclúi 58 señales nes que se va informar sobro les especies, equipamientos y otros elementos singulares del pulmón verde de la ciudá. Los paneles van cuntar con códigos QR gracies a los que podrá aportase a información en distintos idiomes, llocuciones y vídeos.

La conceyala d’Infraestructures en funciones, Ana Rivas, presentó esta selmana pasada al pie de Juan Carlos Menéndez, Xefe del Serviciu Municipal de Parques y Xardinos y el diseñador Ignacio Martínez Lloreo, la nueva señalización  d’equipamientos y botánica del Campu San Francisco, que podrán instalase a lo llargo de 2019 con un presupuestu de 53.000 euros. Según detalló la edil, con esti proyectu “va faese más prestosu si cabo’l paséu pel Campu San Francisco, sobretou de cara a los turistes”. En total van habilitase 58 señales, totalmente accesibles, nes que se va incluyir información sobro les especies botániques, elementos singulares y equipamientos de los que dispon esti parque.

Por que el mayor númberu de persones puedan consultar esta información los paneles van allugase nos marxes de los caminos y parceles, de cuenta que resulten lexibles y tanxibles (yá que van incluyir información en braille). Amás, y gracies al usu de tecnoloxía NFC y códigos QR, podrá aportase a información ampliada, con múltiples opciones, ente les que destaquen llocuciones, vídeos y xuna base de datos con 88 especies forestales censaes nel Campu.

Según resaltó la edil, el proyectu qu’actualiza y afai l’actual señalización del parque (que data de los años 80) cunta yá col vistu bonu del Gobiernu del Principáu, un pasu imprescindible, al tar catalogáu como xardín históricu. Tan solo queda por determinar el color de los paneles, siendo l’azul el color propuestu pol Conceyu d’Uviéu.