El Cabu Peñes y la Comarca la Sidra entamen una campaña de seguridá nes playes

La Mancomunidá d’El Cabu Peñes y la Comarca la Sidra, “conscientes de que l’usu de la Llingua autóctona caltiénense con puxu gracies a actuaciones de gran influxu”, tán entamando estos díes el repartu d’una nueva campaña de sensibilización social nos sos conceyos. Asina, “aprovechando la potencialidá turística d’estos conceyos y l’enfotu de facer llegar esta bayura al foriatu que los visita emplegando la Llingua Asturiana”, ye’l propósitu d’esta Campaña de Fomentu del Usu y Sensibilización Positiva del Asturianu nuna campaña dirixida a les midíes de seguridá y prevención nes playes, aumentando les midíes d’autoprotección y concienciando a los bañistes d’un refileru encamientos que son fundamentales.

El material va repartise nos meses de xunetu y agostu, non solo nos puestos de socorru y centros de salú o ambulatorios sinón tamién nes escueles, IES, oficines de turismu, feries de turismu, centros de mayores y cualesquier puntu afayadizu al conteníu la campaña y ye, de toes toes, siempre según los sos responsables, “de gran valir informativu”.

La campaña, que col eslogan “Na mar nun sías calamar”, cuenta col sofitu de la Mancomunidá d’El Cabu Peñes y la Conseyería de Cultura y Turismu, ta entamada pol Serviciu de Normalización Llingüística de la mesma Mancomunidá y ye una actividá n’andecha col SNL de la Comarca de la Sidra. Cuenta esta campaña con un cartel en tres llingües (asturianu, castellanu y inglés) sobre delles situaciones rellacionaes cola “cadena de sobrevivencia”, un manual dirixíu sobre manera a los/les socorristes de les nuestres playes y del que tamién pue participar el ciudadanu de la cai; un trípticu bien prestosu sobre midíes de seguridá nes playes (solina, cortes de dixestión, picadures, encamientos pa neños/es, etc) y un balón de playa.