Delfo Valdés: “Nos directos aportamos bon humor y folixa”

Yá ta na cai el discu Ö-3-3 (Otres trés) del grupu La Tarrancha. Anque yá teníen asoleyaos dellos trabayos como la maqueta Qlt? (culete?) y la participación en dellos compilatorios y tributos, ésti ye’l discu primeru de llarga duración de la banda. Autoproducíu pol grupu y el sellu Algamar Producciones, grabóse en Tutu Estudiu por Sergio Rodriguez nel pasáu mes d’ochobre. Pa falar d’esti trabayu y d’otres cuestiones venceyaes cola música, Asturnews convida a la Entrevista de la Selmana a Delfín Valdes (Delfo) voz y xiblates del grupu.

-Otres trés, una forma de pidir más música nos conciertos que surdió del públicu asturianu y que lleváis al títulu del vuesu discu, cuéntenos l’orixe d’esta espresión…

-(rises) Hai a quien-y suena a cuentu chinu, pues diz que lleva media vida glayándolo, pero en realidá too entamó va munchos años nun conciertu n’Euskadi. La verdá que nun recuerdo mui bien nin l’añu nin el llugar, pero tamos falando ente 1994 y 1995. Los vascos pa pidir otra glayen “Beste bat! beste bat! Beste bat!” Asina, con un ritmu y un tiempu concretu, los franceses usen esi mesmu son pa pidir más, pero en francés, claro (rises). De la que la xente taba glayando eso a coru eso, escomenzó a sentise “Otres trés! otres trés!” Esi dia ñació un chiste priváu que dempués diba dir repitiéndose nueche celta tres nueche celta hasta dir espardiéndose per cualesquier conciertu, yá seya de Dixebra o la Pantoja. Anguaño hai xente que pide “Otres diez!”, pero ehí, el chiste pierde la gracia de dicir una “o” y dar dos golpes con trés, lo que vien a ser como gastamos nel títulu del discu, “o tres tres!” Pensando na importancia que tien la frase dientro de la musica en directo, tamién dientro de les ganes de pasalo bien, escoyimos esti titulu. Ensin dulda ye’l discu más solicitáu del branu, (rises), tol mundu lu reclamaba.

-Dicen del discu que ye orixinal, con un soniu totalmente personal, propiu, pero totalmente eclépticu.., falen d’ustedes como un grupu Ska y Reggae, pero sois mui daos a tocar tolos palos neso que vienen llamando “Mecigayu Ska”, ¿ye esa la llingua que siguen nesti discu?

-Home, de la que ñació’l grupu la nuesa intención yera facer básicamente reggae y ska, con tientes de fusión, pero que la base fuere esa. Col pasu’l tiempu y ensin querer, caún de los temes foi saliendo con un tastu más a swing, o dalgún funk, otros pachanga, mas folkis… pero la base sigue siendo’l regae y l’ska, con toques reggae y eses coses. Por eso, anque cada cantar tenga un estilu distintu, la base rítmica ye cuasi la mesma.

-Nesti discu vamos disfrutar de 12 nuevos temes, ¿cuáles destacaría y por qué?

-Bono, en realidá hailos mui vieyos (rises). Non, falando en serio, hai temes vieyos y más nuevos, pero sacando ún, los demás nunca nun fueron asoleyaos en nengún discu. Y home… destacar destacar… de xuru que caún de nós préstra-y más ún qu’otru, pero ufff, destacar dalgún en concretu… “Tu a quien quies más a to pá o a to ma?” (rises) Ye cuasi lo mesmo, son toos nuesos, hailos que mos presten más y otros menos, pero nel momentu nel que se fixerón prestáronmos toos. Igual podríemos destacar La Nuechi que t’alcontré, La Palabra Llibertá y Qltiando, que pese a ser más o menos recientes son caún d’ellos mui estremáu l’ún del otru. Pero destacaríalos namás por eso, por que son un exemplu de que vamos siguir nesi camín del eclepticismu dientro del nuesu soníu.

-Y en cuantes a les lletres, son mui reinvindicativos, anque lo faen con humor, ¿ye imprescindible pa nun pasar la vida malhumoráu?

-Hai de too, la verdá, que nun mos paramos a pensar si esta lletra va dir nesta llinia o n’otra. Pero sí, hai lletres mas que reivindicatives, denunciantes, insultanemente y necesariamente denunciantes y tamien les hai que son pura chancia, otres son puru amor y otres falen de la muerte, de la soledá… Tamién tenemos dalguna etilico-enolóxica-cultural-reivindicativa como ye’l casu de “Qltiando”,(rises). Nun sé si esta amalgama de coses ye pa nun pasar pela vida malhumoráu o pa dir con una confusión mental de la de coyer!!! Pero imprescindible’l bon humor y la folixa, eso más que nes lletres aportámoslo nos directos.

-Tolos cantares son n’asturianu, menos una d’elles que ta na fala de la zona Navia-Eo, cómo-yos dio por ello?

-Prescisamente lo que te comentaba enantes, l’únicu cantar que yá saliera asoleyáu fuera RSR, anque d’aquela col titulu de Reggae Sound Reggae. D’aquella yera l’únicu cantar que salió en castellán na maqueta. Quiximos recuperala pal discu, pero yá non en castellán, sinón na fala del Navia-Eo o gallego-asturianu. Ye una forma de dar a conocer la diversidá llingüística d’Asturies a muncha xente mozo o non tan mozo que tando nel centru d’Asturies desconoz esa realidá. Tamien ye una forma de reivindicar la presencia del gallego-asturianu na música, acullá del folk.

-Si hai una cosa que llama l’atención de La Tarrancha ye la cantidá d’instrumentos colos que trabayen: curdión, trombón y les xiblates, guitarres, baxu, percusiones llatines y africanes, bateria…

-Y más que tuvimos!!! nun principiu teníemos claro que los vientos tendrien de tener un pesu específicu dientro la banda. Tantu ye asina que lleguemos a tener una sección de metales con dos saxos, trombón y trompeta. Pero si por dalgo se caracteriza La Tarrancha ye que la xente va y vien, y dempués de quedar delles vegaes ensin metales y viendo que nun los atopábemos, foi cuando decidimos cambiar un poco’l soníu del grupu, meter una curdión diátonica y da-y más pesu a les xiblates, (a falta de pan…) Dempues apaeció un trombonista y asina quedó l’asuntu. Creemos que la cosa ta bien asina; home de xuru que con unos metales quedaria mas curioso, pero nun queremos arriesganos a meter a más xente pa restructuralo too otra vez y a los dos dies quedar tiraos.

-El discu cuenta con delles collaboraciones de luxu: Moi de Felpeyu, Vito de Chalarenu Sound y otros munchos, ¿esto aporta al grupu idees nueves y lu arriquez?

-La verdá ye que díbemos con priesta pal estudiu y nun teníemos pensao meter nenguna collaboración. Pero bono, al final salió dalguna, esperemos que pal próximu podamos dir más tranquilos y facer unes collaboraciones mas curraes y asina nun estresar a los convidaos (rises). Lo de Moi foi una sorpresa, resulta que’l nuesu guitarrista Benja diba dexalo dempués de grabar el discu porque nun daba abastu col trabayu y esi mesmu problema aparte d’un acidente que tuvo, ficieron que’l so gran amigu y maestru Moi mos echara un gabitu. Hai que dicir que por una errata Benja nun sal nel llibretu, (nin tampoco la lletra de Njabingui), va matame cuando me vea (rises).

Aparte de les collaboraciones de Moi y Benja nes guitarres tamién la tuvimos de dos “des-componetes” del la banda, como yeren Iván antiguu miembru fundador y Juancho a la trompeta y el saxu respectivamente, que mos echaron una mano en dalgún de los temes. Ta claro que la nuesa idea dende’l principiu yera faer una banda na que hubiere voz femenina y masculina. Pel grupu pasaron Silvia y Vito, dos grandes moces y dos grandes voces, cauna col so estilu y la so personalidá. Nun podíemos dexar que La Tarrancha nun tuviera presente nel so discu parte de la so esencia y ye por ello que grabaron y grabarán siempres que quieran. Creo que les collaboraciones faen muncho n’esti discu, porque al fin y al cabu nun dexa de ser La Tarrancha en si mesma.

-Una cosa que llama l’atención del discu ye que lu tienen embaxo llicencia Creative Commons, ¿qué ye esactamente esto y por qué tomáis esta decisión?

-Bono, aparte del “Tolos drechos reservaos” de la SGAE, hai otros que podríemos denomar dalgunos drechos reservaós. Dientro d’estos últimos hai dellos tipos de llicencia. Una d’elles son los Creative Commons, ye una llicencia na que pues combinar delles característiques (a gustu del creador) baxo les que publicar la to obra. Pue ser con drechos derivaos o ensim ellos… pue ser ensin repercusión económica o con ella… Lo que ta claro ye que nenguna radio, televisón chigre, peluqueria o lo que so madre seya va tener que pagar a nadie polos drechos d’emisión, y la so descarga per internet ye llibre y gratuita ensin qu’esto suponga delitu. Con eso lo que queremos reivindicar ye la universalidá de la cultura, lo que pretendemos ye llegar a tol mundu y en tol mundu. Y con eso tamién lo que pretendemos ye nun formar parte d’una entidá como la SGAE que diz defender los drechos de los autores, y defender la cultura cuando realmente la ataquen. Porque coles sos politiques reacaudatories, totalmente desacertaes, mete a tol mundu nel mesmu sacu, los que tamos na SGAE y los que nun tamos, y nun ye asina. A min por mercar un coche nun me meten una multa y me quiten cuatro puntos del carnet, por qué por comprar un equipo informaticu o un CD virxe ellos apliquen un Canón?’ ye como multate ensin cometer delitu. Non tola cultura ta embaxo l’“amparu” de la SGAE, hai munches coses poles que tán cobrando poles que los sos autores nun reciben los benficios que xeneren. Por embargu ellos faen tabla ras y coben por too. Los grupos pequeños pa tocar toquen en chigre, en pequeños festivales… La mayor parte les vegaes pa cuatro duros o poles birres, y dempués lleguen los de la SGAE a cobra-yos a los organizadores el so tantu por cientu, lo mesmo da si los grupos tán na SGAE como si non, da igual si ye una asociación de festexos o d’amigos o un chigre, ellos van allá, y si nun pagues corten el conciertu. Eso fai que la xente s’eche p’atrás, que pase de montar conciertos, y eso fai que los grupos nun tengan onde tocar, lo que fai que mengüe la cultura y a la fin eso fai que muerra too.

-¿Cómo ha solucionase’l problema actual ente los intereses de los autores y los del públicu?

-Ufff, eso ye complicao, pero de momentu’l rumbu de la SGAE nun ye’l correctu. Ta claro qu’hai munches compañíes discográfiques y dalgunos grupos o profesionales de la musica que pierden perres coles decargues y otres coses. O que mas que perder… dexen de ganar, porque non tol mundo que decargar un cantar o un discu de fulanu o menganu quier dicir que fuera acomprar el discu. Nunca se consumió tanta música como agora con esto de les descargues y la piratería, otra cosa nun quier dicir que de tener que pagalo fuere a consumise lo mesmo.

Lo que si ta claro ye que los artistes que quieren cobrar los sos drechos d’autor, tán nel so drechu, pero per enriba hai una serie de drechos de los ciudadanos, y per enriba hai unos drechos del restu de creadores que nun tán na SGAE, y énte eso hai que buscar soluciones, pa que se respeten los drechos de toos, tantro d’unos como d’otros. Pero diendo pel camín que vamos onde’l gobiernu non solo ampara un monopliu de la xestión de drechos sinón que fai normes al so favor… mal vamos.

-Creo que tienen previstos dellos conciertos pa dientro poco…

-Si’l 4 febreru vamos tar tocando nun conciertu-espicha nel Terra Astur de Cualloto, pa más alantre, pal 17 d’abril tenemos zarrada la nuesa presencia nel Festival Rude Gaita, xunto a los vascos Betagarri y los italianos Talco, y tenemos más cosuques perhí, pero al ser tantos y con distintos compromisos llaborales y n’otros grupos tenemos que dir afitando les feches.

La Tarrancha saca estes navidaes Ö-3-3 (Otres tres)