Portada Lliteratura Daniel Estrada gana’l XI Concursu de Cuentos pola Oficialidá

Daniel Estrada gana’l XI Concursu de Cuentos pola Oficialidá

by asturnet

Daniel Estrada Gómez-Acebo foi el ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so undécima edición. El primer premiu, dotáu con 800 euros, foi pa la so obra “La mano na ventana”. L’autor, cántabru emigráu en Barcelona, yá ganare esti añu’l XI Concursu de Cartes d’Amor del Conceyu d’Ayer na categoría de llingua asturiana.

El segundu premiu, dotáu con 500 euros, foi pal cuentu “Vaciáu de copes”, de l’avilesina Luisa Méndez Fernández, y el maliayés David Manuel Rivas Infante algamó’l tercer premiu, al que se-y apurren 350 euros, con “Un mediudía de xunetu”.

La entrega de premios va tener llugar na Casa la Cultura de Santuyano, de magar les 19’45 hores, el prósimu vienres, día 4. L’actu, nel que se fadrá llectura pública del cuentu ganador y que cuntará cola presencia de José Emilio González Aller, Alcalde de Bimenes, finará cola actuación de Lluis Antón González, que representará los monólogos “Los asturianos al volante” y “Les vacaciones”.

Tamién te podria gustar