CUPX pide a los medios más atención al traviés d’un comunicáu

Asturnews ufre’l so comunicáu completu:

Conceyu d’Unidá Popular de Xixón: La nuesa voz val más que los sos beneficios. Vamos en serio.

Comunicáu del CUPX énte’l silenciu de los medios de comunicación del Réxime

Les empreses periodístiques tiénenlo claro: sirven a la so cuenta de resultancies y nun-yos importa lo más mínimo la información, nin siquier penerada pola ideoloxía de caun de los grupos editoriales a los que sirven: los Vocentos, les Prieses, los Epis y los Blas…, voceros, con pequenos matices, del mesmu pensamientu únicu imperante, tan necesariu por que funcione el sistema, reproduciéndose a sigo mesmu “sine die”. Referímonos a esti sistema incapaz de dar trabayu, derechos, bienestar y futuru a los sos ciudadanos y ciudadanes. Per esti camín, llueu vamos volver a la vieya conseña de “Pan, Trabayu y Llibertá”.

Reclamamos pa los periodistes y trabayadores de la información el rigor y el bon oficiu de servidores públicos que naguaben cuando empecipiaron esta vía profesional. Nun cayimos de nenguna guindal y sabemos lo que ye un mediu de comunicación coles sos xerarquíes y esclavitúes. De la mesma manera que sabemos solidarizanos colos sos trabayadores cuando lluchen contra la precariedá, la subcontratación, los sueldos miserables del sector, o la inmoral esplotación de los becarios. Nel últimu llustru, los activistes que formamos parte del CUPX, tuvimos nes concentraciones, nes denuncies y nes lluches de el trabayadores regulaos, o despidíos del sector por empreses como Telegijón, La Voz, El Comercio…, pa especular a les sos anches y caltener les sos tases de beneficios.

Yá sabemos que la prensa del Réxime da-y sopes con fondes al mesmu David Copperfield, faciendo sumir pitaes al ministru Valeriano Gómez, a Zapatero, plantes, concentraciones…, inclusive a los más de dos mil manifestantes “Contra los Retayos” que’l pasáu avientu allegaron al llamamientu de los sindicatos combativos. Nun-yos importar faer el risible énte los sos llectores, si con ello facen cumplir la máxima de “quien se mueve, nun sale na semeya”.

Esiximos l’atención y el respetu que merecemos: nin más, nin menos. Vamos en serio: nun tamos xugando a “Indios y Vaqueros”, nin a “Policías y Lladrones”, nin siquier a “Antidisturbios y Antisistema”. Somos parte d’esti Xixón y, pa bien o pa mal, construyímoslu coles nueses manos, colos nuesos fégados y les nueses veríes. N’ocasiones con allegría y rises; n’otres con dolor y llarimes. Equí, nestes cais de la nuesa Ciudá del Sol, canu y caúna de nós inventamos l’amor, amburamos la pasión, forxamos la nuesa conciencia y, ente los sos Siete Muralles, mos vamos construyendo llibres.

Somos los biznietos de Eladio Carreño; les nietes de Rosario Acuña; los sobrinos de Eluterio Quintanilla y de Horacio Argüelles; les amigues d’El Pescao y El Calavera que morrieron nes barricaes de Cimavilla y de El Llanu n’ochobre del 34: nós como ellos, tamién llevamos un Mundu Nuevu nos nuesos corazones.

Somos los fíos y fíes de Mallada, de Intrialgo, de Wenceslao Roces, de Rufino García, d’Esmeralda Maseda, de Pachín de Melás y d’Ignacio Colao… y tamién de La Perala, de Rambal, de Poquinone y de Pedrito “L’Home del Tiempu”. Somos los hermanos y hermanes de lleche de Susana Estrada y del Bruxu, porque les nueses madres mercábenla a la mesma muyerina de la Plaza del Sur. Pasiamos estes cais al llau de José Luis García Rúa, o de Mánfer de la Llera.

Nun nos andar xingando. Resolver la papeleta informativa del Conceyu d’Unidá Popular de Xixón, con una semeya mediu escondida y con un curtiu comentariu al pie (o nin eso), seguro que-yos va gustar enforma a los que vos sofiten cola publicidá institucional y la propaganda de los partíos del Réxime, pero con ello secuestráis el derechu d’información. Vais poder ignoranos, pero nun nos vais facer callar, como nun lo fixo nin Franco, nin Claudio Ramos, nin Recaredo, nin Pedrosa, nin “El Gitanu”. Namás los babayos pónen-y puertes al campu. Vamos en serio.