Saltantes Teatro, Carlos Alba y Escenapache son los finalistes del Premiu Nel Amaro

El VII Festival Nel Amaro de Teatru Profesional en asturianu vieno acabante asoleyar los finalistes del Premiu «Nel Amaro» qu’esti añu son les obres de Saltantes Teatro, Carlos Alba y Escenapache, que van representase del 29 de setiembre al 20 d’ochobre.

El festival va celebrase nel Teatru Filarmónica d’Uviéu, con representaciones aptes pa tolos públicos. Les obres ganadores del añu anterior van abrir y zarrar l’espectáculu. El premiu, dotáu con 6.000 euros, busca afianzar y enriquecer la llingua asturiana y el gallego-asturianu nel ámbitu teatral.

El xuráu, integráu por especialistes en teatru y llingua asturiana y presidíu pol director xeneral de Política Llingüística, Antón García, escoyó na so primer xunta estos trabayos pa representase nel V Festival Nel Amaro nes feches indicaes:

• Xuan Soldáu, de Carlos Alba (6 d’ochobre).
• El gorrumbu, de Saltantes Teatro (13 d’ochobre).
• Caperucita en Muniellos, d’Escenapache (20 d’ochobre).

El públicu va tener ocasión de volver disfrutar de les obres ganadores del añu 2021 y 2022, La reina de la guapura de Leenane, de Nun Tris Producciones, y Les madreñes vacíes, de Carlos Alba, que van abrir y zarrar, respectivamente, el festival los díes 29 de setiembre y 27 d’ochobre.

El festival y el premiu lleven’l nome del autor Nel Amaro, consideráu una referencia na vanguardia teatral asturiana y a quien s’ufiertó la Selmana de les Lletres Asturianes nel 2021