Convocáu n’Avilés un concursu de microrrelatos

Con motivu de les Fiestes de San Roque del Carbayedo, a facer n’Avilés del 17 al 20 d’agostu del 2007, y col aquel d’animar a la creación lliteraria en llingua asturiana, l’Asociación de Vecinos El Hórreo del Carbayedo, en collaboración cola Estaya de Normalización Llingüística del Ayuntamientu d’Avilés entama’l Primer Concursu de Microrrelatos “L’HÓRREO DEL CARBAYEDO”.

Esti primer concursu tien les BASES que darréu apaecen: 1- Pue participar cualisquier escritor/a en llingua asturiana con un máximu de tres rellatos. 2- Los rellatos nun puen pasar de les 500 pallabres. La temática ye llibre. 3- Los rellatos puen presentase hasta’l día 6 d’agostu de les siguientes maneres:

A- Pel Corréu Postal a A.VV. EL HÓRREO, C/Dr. Marañón, 16, bajo, 33402, Avilés.

B- Pel Corréu Electrónicu a avvelhorreo@yahoo.es

Nel primeru de los casos mandaránse los rellatos per triplicao, nun importando nin la tipografía nin el tamañu la lletra, siempre que seya lexible y los microrrellatos nun pasen d’eses 500 pallabres. Los unvíos, per una o otra vía, han ser anónimos, con un sobre colos datos reales del autor/a aparte. El cierre de recepción de les obres acaba’l 6 d’Agostu, respetándose aquellos que puean llegar pel Corréu Postal más tarde.

Y nel casu de los que se manden pel Corréu Electrónicu, la sistemática va ser la que sigue: Primero.- Los trabayos mandaránse al mail espuestu firmao con un nomatu/pseudónimu. Les señes del mail nun puen ser indicatives de l´autoría. Esos mandaos han facese hasta les 14 h del día 6 d´agostu. A partir d’esa hora nun se van aceptar unvíos. Segundo.- De ganar dalgún cuentu mandáu per esta canal, el xuráu mandará mail reclamando los datos del cuentu ganador.

Daráse un primer premiu de 300 € al meyor rellatu y 3 premios consistentes en lotes de libros valoraos en 100 €, a los tres finalistes.

El 10 d’agostu un xuráu entamáu por reconocíes personalidaes de la cultura asturiana determinará los ganadores. El llunes, 20 d’agostu, los cuentos ganadores van ser lleíos por CONTADORES PROFESIONALES o polos mesmos autores nel campu la fiesta (parque del Carbayedo), a les 20:00 hores. A esi actu han asistir los ganadores, pa recoyer los premios.

Los microrrellatos ganadores y finalistes van ser pasaos a gran formatu y expuestos durante delles xornaes nos chigres del Barriu pa públicu conocimiento y promoción de los autores galardonaos. Asinamesmo TOLOS RELLATOS PRESENTAOS van ser expuestos nuna específica ESPOSICIÓN que se va presentar en xunto col programa Fiestes y que va tar abierta al públicu los díes que estes duren.

El Xuráu entenderá de cualisquier dulda o problema que puea apaecer. A les sos decisiones nun se pue retrucar. Presentase a esti Concursu implica la plena aceptación d´estes BASES.