Compromisu refuga les nueves explotaciones a cielu abiertu

Compromisu por Asturies llama al refugu social y de les alministraciones públiques a l’apertura de nueves mines a cielu abiertu nes Cuenques del Caudal y del Nalón, ante l’anunciu efectuáu por HUNOSA de siguir alantre colos sos planes d’abrir nueves esplotaciones, motivu pol qu’acutaría 1,25 millones d’euros partíos ente 2015 y 2017.

Esta inversión empobinaríase pa la preparación de les mines a cielu abiertu na so totalidá polo que Compromisu llama a la sociedá de los conceyos afectaos a refugar unos planes que, xuntu col zarru de la minería d’interior, van echar per tierra les meyores qu’al traviés de cuantiosos esfuerzos económicos llográrense tantu en materia de recuperación medioambiental como urbanística, significando a mediu y llargu plazu la ruina económica pal vecinderu afectáu, asina como pa los mesmos conceyos.

Ante esta situación, Compromisu llama a la movilización social pa refugar los planes d’HUNOSA y encamienta a los Conceyos afectaos a manifestar el so refugu a dichos planes. A tal fin anunciamos yá que, de forma inmediata vamos empecipiar una serie de contactos con entidaes sociales, polítiques y sindicales pa, de forma unitaria, constituyir una plataforma qu’apigure a toles persones, organizaciones y colectivos que refuguen les pretensiones de l’actual dirección d’HUNOSA.