Cinco científicos de vanguardia na llucha contra’l cáncer algamen el premiu ‘Príncipe’ d’Investigación

El Premiu ‘Príncipe de Asturias’ d’Investigación científica y técnica reconoz l’estudiu internacional de vanguardia sobro l’orixe y desendolcu del cáncer. El xuráu premió esti mediudía n’Uviéu a los científicos Joan Massagué, Judah Folkman, Bert Vogelstein, Robert Weinberg y Tony Hunter por responder a “ún de los mayores retos de la Humanidá”, como autores d’un llabor citáu en más de 250.000 referencies bibliográfiques.

Na so acta, los miembros del xuráu del ‘Príncipe’ d’Investigación destaquen “l’enorme impactu” de la producción científica de los cinco espertos premiaos y eloxa les sos decisives contribuciones tanto pa delimitar les bases del cáncer, como pal desendolcu de nueves llinies de tratamientu d’esa enfermedá.

El catalán Joan Massagué despunta como ún de los meyores conocedores de cómo s’orixinen les metástasis tumorales, mientres que’l británicu Tony Hunter ye autor del descubrimientu d’una enzima que permite definir l’activación del procesu cancerosu y ellaborar fármacos con cierta eficacia.

Pol so llau, a los tres científicos estaoxunidenses premiaos valórase-yos la conocencia del sistema vascular que desendolquen los tumores (Judah Folkman), la definición de la base molecular del cáncer de colon (Bert Volgestein) y la pionera identificación d’oncoxenes humanos (Robert Weinberg).

La candidatura de los cinco oncólogos foi presentada pol caderalgu de Microbioloxía César Nombela, miembru del xuráu, ya impúsose a otres 44 persones y collectivos qu’optaben al galardón, el segundu que la Fundación ‘Príncipe de Asturias’ concede na so edición d’esti añu depués que l’escritor y xermanista italianu Claudio Magris algamara’l ‘Príncipe’ de les Lletres el pasáu vienres.

El galardón algamáu pol equipu plurinacional d’investigación contra’l cáncer ta destináu a valorar el llabor de la persona, grupu de trabayu o institución cuyos descubrimientos o xera d’investigación representen una contribución importante pal progresu de la Humanidá nes estayes de les Matemátiques, la Física, la Química, la Bioloxía, la Medicina y les Ciencies de la Tierra y del Espaciu.