Chechu García: “Sedría importante tener boletinos informativos n’asturianu na RPA”

Chechu García (L’Entregu, 1970) ye Llicenciáu en Bioloxia, pero la so carrera llevólu per caminos bien estremaos. Consideráu ún de los escritores más importantes de la segunda xeneración del Surdimientu, trabaya con ésitu cásique tolos xéneros: poesía, lliteratura infantil y xuvenil, teatru, ensayu… Recibió numberosos premios y forma parte de la tertulia Reciella Malory. Sicasí, el so llabor más conocíu nos años últimos ye la dirección del programa “Nomes d’Asturies”, na RPA, nel que se dramaticen fechos de la hestoria d’Asturies con un grupu d’actores. Lleva emitíos más de 200 capítulos. Falamos con él del programa y d’otros proyectos de so.

-Nomes d’Asturies ye yá un clásicu de les ondes asturianes, ¿satisfechu col trabayu fechu?

-Tol equipu de Nomes d’Asturies tamos arguyosos de lo fecho, creo que ye una de les causes de qu’un programa con tantes dificultaes de fechura técnica aguante tantu tiempu, fuimos ameyorando dende los anicios y eso nótase. D’otra miente la TPA escoyómos pa ser finalistes de los premios Ondas nos años 2008 y 2009 y ye d’agradecer esa confianza y el reconocimientu al nuestru trabayu. Tamién sabemos que la respuesta del públicu ye mui bona, tenemos un públicu mui heteroxeneu al que-y presta la fórmula de radio-teatru que damos al programa.

-¿Cómo ye’l procesu pa facer un capítulu de Nomes d’Asturies?

-Lo primero de too, escoyer un personaxe o fechu hestóricu, de,pués el guionista fai un llabor d’investigación y mete les dramatizaciones, apurre’l resultáu al coordinador que lu revisa. Repártense los personaxes a los actores, ensáyase y depués al estudiu de grabación. El procesu ye llargu y necesita un equipu ampliu de persones, dende l’ambientador musical, Manolo Abad, a la técnica de soníu, Lucía Menéndez.

-¿Qué “Nomes d’Asturies” recuerda con más ciñu?

-Igual el primeru, que taba dedicáu a la catedral d’Uviéu, nun teníemos unes bases pa facelu, un esquema que mos valiera d’exemplu, un guión anterior nel que mirar. Mano a mano con Roberto Corte punxímonos a ello y depués de munchísimes hores de trabayu salió’l primer capítulu, paecía imposible que pudiéremos sacar unu a la selmana, pero cola ayuda d’un maraviyosu equipu de guionistes (Cristina Muñiz, Azucena álvarez, Mar Martín, Inacio Solar, Marta Rodríguez…) yá llevamos más de doscientos. Tamién me prestaron muncho los dedicaos a la mitoloxía asturiana o los de cuentos infantiles y un doble programa dedicáu a la Revolución d’Ochobre, nel que ficimos una adaptación llibre de la obra d’Albert Camus “Revuelta n’Asturies”.

-Dempués de tantos programaes, ¿qué personaxes o feches relevantes falten por facer?

-Falten, falten, por poné-y un exemplu, tovía nun-y dediquemos ún a Campomanes, tampoco a Alfonso Camín o a la Francesada. D’otra miente tamos preparando’l de Tino Casal y prestábamos averamos a la figura de Nel Amaro como homenaxe.

Ye increíble tolo que desconocemos de la nuestra historia, esti día grabemos un capítulu dedicáu a Melchor de Valdés, cantor y compositor asturianu que cantó na boda de Felipe II y María Tudor, allá, na catedral de Winchester, nel sieglu XVI. Yera’l meyor contratenor d’Europa.

-¿Cómo ve la programación n’asturianu de la RPA?

-Veola curtia, prestábame qu’hubiere más programes n’asturianu, creo qu’estos años valieron p’amosar la gran calidá que puen algamar programes como Rockmería, Acuto, Batura, Paraísu Natural, Revoltixu nes ondes o Música Músiques ente más otros.

Creo que’l llabor más importante nesti sen, ye que los programes n’asturianu permitieron formar a persones nel mediu, saber cómo furrula y asina vamos teniendo guionistes, actores, coordinadores, técnicos formaos, avezaos a trabayar n’asturianu y que van ser capaces d’entamar nuevos proyectos más ambiciosos.

-Na so opinión, ¿qué conteníos ye más urxente facer n’asturianu?

-Na radio diba ser importante tener boletinos informativos, quiciabes programes deportivos y tentar de facer un programa infantil.
Na televisión, amás d’informativos, retresmisiones deportives, programes infantiles dafechu n’asturianu, doblaxe de películes n’asturianu y series de dibuxos animaos. Nesti tiempu, pudo comprobase que la respuesta de l’audiencia colos programes n’asturianu, siempres que tengan calidá, yera bona.

-Va tiempu que nun tenemos un llibru de so ente les manes, ¿parada la producción por Nomes d’Asturies?

-En Nomes d’Asturies arrecostino con muncho trabayu, un programa a la selmana coles dificultaes técniques que tien ye una carga de trabayu grande, amás nesti últimu añu con un equipu de profesores de Secundaria tuvimos trabayando nun llibru con unidaes didáctiques de Nomes d’Asturies que valga de ferramienta educativa nos institutos. Quiciabes si tengo vagar pel branu acabo un poemariu col que llevo tiempu engarrándome.

-Amás, ye profesor, viviéndola de cerca, ¿cómo valora la situación del asturianu na enseñanza?

-Mui meyorable, en Secundaria ye una asignatura optativa y tenía de ser voluntaria. N’Infantil queda de mano de la direición de los centros ufiertalo como asignatura o non. Amás siguen ensin esistir places específiques d’asturianu, nun hai oposiciones y la situación ye d’interininidá total. Y esto, depués de delles sentencies xudiciales afitando la illegalidá de caltener estes situaciones de forma indefinida. Entender nun entiendo porque nun s’estabiliza esta situación y se “normaliza“ l’asignatura d’asturianu na educación.

-Va tiempu que trabaya col so hermanu na hestoria del cómic n’asturianu, ¿qué pue contanos sobre esi estudiu?

-Sí llevamos más de dos años atropando información, el mio hermanu Próspero ta de profesor nel Amherts College na Universidá de Massachussets y fizo un estudiu de la presencia del Quixote nel cómic, amás d’un trabayu sobre’l cómic en castellán nos Estaos Xuníos, la situación del castellán nos Estaos Xuníos aseméyase muncho cola a la del asturianu, son llingües B, non dominantes, nesi sen, lo que tamos faciendo ye una historia del cómic n’asturianu qu’enllace cola cultura asturiana en xunto, quiero dicir, ¿Esistió nos años 80 un Surdimientu nel cómic asemeyáu al de la lliteratura? Sí y teníen la mesma fonte que na música y otres artes: la respuesta a una nueva situación política.

-¿Hai planes d’espublizalu?

-Nello tamos, pa esti branu toca facer un montonera d’entrevistes a xente del cómic como Lluis Antón González, director de la mítica revista “El Llapiceru”, Próspero Morán, Neto, Isaac del Rivero o Alfonso Zapico, queremos conocer munches opiniones pa dar una visión global. Ye un trabayu escomanáu, tamién tamos investigando si esistió humor gráficu n’asturianu nos centros asturianos de Llatinoamérica. Pa facese una idea, les primeres viñetes n’asturianu son de 1881 tovía con tastos del Romanticismu, son 130 años d’hestoria.

-¿Tien tiempu pa pensar n’otros proyectos nuevos?

-Los optimistes siempres tienen un proyectu y los pesimistes siempres tienen una escusa. Yo soi de proyectos. Agora en sacando’l llibru d’unidaes didáctiques de Nomes d’Asturies garraré fuelgu y veré a qué xeres m’arimo.