Cangas quier construir un abellugu xuvenil ambientáu como un castru na zona de Sierra

El conceyu de Cangas del Narcea quier construir un abellegu xuvenil, destináu a colonies escolares y grupos d’escursionistes, con forma y ambientación de pobláu castreñu. El proyectu de l’Axencia de Desarrollu Local, Turismu y Festeyos, ta incluíu ya nel Plan d’Actuaciones Turístiques Altu Narcea, con cargu a los Fondos Mineros y forma tamién parte de los proyectos sofitaos poles llinies de financiación PRODER. El so asitiamientu ta previstu pa la zona de Sierra. Cangas del Narcea tamién proyecta la recuperación del castru de Treamao de Carbayo, un de los principales xacimientos del conceyu.

La redacción del proyectu pa construir un abellugu xuvenil que recree les formes y l’ambientación d’un castru asturianu ta a espera de que se convoque un concursu d’idees pa desarrollar el conteníu y el diseñu final d’esti futuru equipamientu turísticu. La intención ye que’l so usu se destine a colonies escolares de veranu o como abellugu de grupos d’escursionistes y montañeros. Al empar, los responsables de Desarrollu Local de Cangas, quieren que’l recintu sea tamién un espaciu didácticu, dotáu d’instalaciones con conteníos divulgativos sobre la cultura de los castros. L’abellugu xuvenil tentaría a la fin revivir les actividaes propies de los habitantes de los antiguos poblaos con talleres y reconstrucciones de lo que sería la vida nun auténticu castru.

Per otru llau el conceyu de Cangas quier entamar la recuperación del recintu castreñu de Tremao Carbayo. Pa ello tien previsto escomenzar el proyectu con un estudiu topográficu del xacimientu, la realización de sondeos pa la so datación cronolóxica, la escavación, acondicionamientu y restauración del afayu y la señalización d’un recorríu primariu pel antigu pobláu. Tanto esti proyectu como’l de construir l’abellugu xuvenil enmárquense dientro les actuaciones empobinaes al Desarrollu local del conceyu y a arriquecelu de nuevos atractivos enfocaos a un turismu respetuosu col entornu.