Avilés recuerda a Malgor nel so centenariu

L’Ayuntamientu d’Aviles prepara un homenaxe con motivu de la conmemoración del primer centenariu del nacimientu de Jose María Malgor, tituláu ‘Jose María Malgor, cien años del meyor teatru popular asturianu’, que va tener llugar esti vienres 7 d’ochobre nel Teatru Palaciu Valdes, onde se va poner n’escena la so obra ‘Interdictu o pleitín d’aldea’, a cargu de la Compañía Asturiana de Comedies.

Per otra parte, el 19 d’avientu, el Palaciu de Valdecarzana va acoyer una serie d’actividaes tamien nel marcu d’esti homenaxe que incluirán la llectura de testos de Malgor, la presentación d’una reedición antolóxica de ‘Xilimbra’ y una conferencia a cargu del miembru del Institutu Ridea, Jose Luís Campal, que va repasar la vida y obra del dramaturgu avilesín.

‘Interdicto o pleitín de aldea’, la obra que la Compañía Asturiana de Comedies va representar esti vienres nel Teatru Palaciu Valdes, ye la obra más popular de Jose María Malgor, avilesín nacíu’l 19 d’avientu de 1905 y fallecíu en 1964, dexando una obra breve pero intensa y mui popular. A Interdictu (1944) hai qu’añedir los sos otros dos grandes esitos de 1943, estrenaos nel Teatru Palaciu Valdes: ‘Capitán… yo’ y ‘Refraneru’.