asturnet

Al traviés de les asociaciones Ixuxú Asturies-Euskal Herria elkartea y Xunta Cultural Rebelgu, los conceyos d’Amorebieta-Etxano (Bizkaia) y L.lena (Asturies) impulsaron un intercambiu cultural xuvenil col enfotu de sofitar la creación moza, fomentar la rellación ente cultures y persones, visibilizar la diversidá llingüística, promocionar la música local y dar a conocer la cultura tradicional de los dos pueblos acullá de les sos fronteres.

El 3 de mayu, una ventena de mozos zornotzarras van visitar La Pola, a onde van treslladar una amuesa de la so cultura y de les sos creaciones. A la mañana, miembros del grupu de dances Udabarri va facer una amuesa de dances vasques na plaza Alfonso X El Sabio. Siguirá-y a la tarde una charra sobre l’usu del euskera ente la mocedá d’Amorebieta-Etxano y la proyección del curtiu de la realizadora local Lara Izagirre “Next Stop: Greenland”.

P’acabar a la nueche, y tres un nuevu espectáculu de dances de los representantes d’Udabarri, el grupu de ska-erromeria Eromen va ufiertar un conciertu xunto cola banda l.leniza de hardcore-punk Adizión Etílika. Va ser na carpa de la Plaza Alfonso X El Sabio, onde tol día va haber música y barra, coincidiendo col pasu pel conceyu de la vuelta ciclista.

N’Amorebieta-Etxano, el 31 de mayu, van ser los l.lenizos los que devuelvan la visita. El programa va entamar cola actuación de dellos miembros de la Banda de Gaites Güestia al mediudía nel Parque Zelaieta. A la tarde, el responsable del Serviciu de Normalización Llingüística de la Comarca la Sidra, Pablo X. Suárez, va falar de la llingua asturiana y de les sos polítiques de normalización.

Darréu va proyectase “Suena’l camín”, un documental alrodiu la música asturiana que ganó en 2005 el premiu del concursu “Nun mos cuntes películes, fáiles”, convocáu pol Conseyu de la Mocedá del Principáu d’Asturies. Ún de los sos realizadores, Efrén Álvarez Acebal, va ser l’encargáu de presentar esta obra que grabó na so adolescencia xunto a otros collacios de L.lena.

La degustación de sidra asturiano y vasca al ritmu d’Eromen y Adizión Etílika va poner fin a al segundu intercambiu cultural desendolcáu por Ixuxú Asturies-Euskal Herria elkartea, asociación de xente asturiano emigrada al País Vascu que fai de ponte social y cultural ente los dos pueblos.

El pasáu Sábadu, 26 d’Abril de 2014, na Sede Social d’Humanitarios de San Martin (Moreda-Asturies), tres socesives eliminatories y distintos alderiques, el Xuráu, decidió, por mayoría, otorgar el Galardón “ESPIGA D’ESCANDA D’ORU 2014” A LA TRADICIÓN a l’ASOCIACIÓN CULTURAL “LLACIN”, por: “el so trabayu, esfuerzu ya implicación na recuperación y caltenimientu de la cultura, folklor y gastronomía tradicional asturiana. Poniendo en valor la capacidá de l’Asociación d’aunir la voluntá de tola sociedá civil de Porrúa, y caltenela activa mientres más de veinte año. Ye destacable la so participación y trabayu nel proyectu de Pueblu Cultural Européu.”

Esti premiu constitúi un impulsu más pa siguir trabayando en pro y en beneficiu, del folklor, la tradición, la gastronomía y el costume d’Asturies, lo mesmo que de toos as los nuesos socios/as y de la coleutividá polo xeneral.

La XDLA denuncia nuna nota de prensa asoleyada esti martes pela mañana que “los más de los conceyos asturianos nun usen la toponimia oficial nes sos propies páxines web”, incumpliendo dafechu los decretos de toponimia aprobaos por ellos mesmos y darréu pol Principáu y qu’afiten que los topónimos asturianos tienen la consideración d’oficiales a tolos efectos.

L’incumplimientu dafechu de la llei paez que ta convirtiéndose en daqué xeneralizao pa tolo que tien de ver cola llingua asturiana, sigún se pue siguir de les denuncies costantes d’esta organización.

Depués del requerimientu fechu a toles conseyeríes del Gobiernu del Principáu d’Asturies pol incumplimientu de los decretos de toponimia aprobaos, la Xunta pola Defensa de la Llingua Asturiana (XDLA) pon agora’l focu nes páxines web de los 51 conceyos qu’aprobaron la modificación de la so toponimia y, tres un análisis percompletu, el resultáu ye esmolecedor: namái siete d’esos conceyos utilicen los topónimos oficiales nes sos propies páxines web, al marxe de que tengan o non versiones en llingua asturiana o gallego-asturianu; los otros 44 conceyos incumplen nelles la llegalidá toponímica.

Amás de felicitar a los conceyos que con naturalidá faen lo que tienen que facer, “quier dicise, cumplir la llegalidá al usar los topónimos oficiales nes sos web institucionales, tenemos que denunciar a los que, seya pola dexadez, pola inorancia o pola incompetencia de los sos responsables, nun la cumplen de la mesma forma”. Denuncien tamién “la connivencia nesta illegalidá de los sucesivos gobiernos asturianos que, sabedores d’esta situación, nun fixeron nada en tou esti tiempu pa pone-y final”.

Na XDLA esixen “el cumplimientu estrictu de la llei a tolos conceyos que tienen el decretu toponímicu aprobáu, non namás nos testos de les sos páxines web, sinón en tola documentación municipal, na retulación de les dependencies de la casa conceyu, nos lletreros de la rede viaria, nos mapes y planos oficiales, y en cualquier ámbitu que visibilice los topónimos oficiales. Esiximos que l’alministración asturiana exerza´l so llabor de tutela, vixilancia y control del cumplimientu de la llegalidá, colos mesmos mecanismos qu’implementa pa les demás normes”.

Del mesmu mou, esixen tamién que “dende la Conseyería d’Educación, Cultura y Deporte s’impulse’l trabayu de la Xunta Asesora de Toponimia y s’entaíne nel procesu d’aprobación de los 27 decretos de toponimia que queden pa completar el territoriu asturianu. La Llei d’usu y promoción del asturianu ye de 1998, pero nun foi hasta’l 2005 cuando s’empezaron a aprobar los primeros decretos d’oficialización toponímica. Y si ye verdá que’l procesu foi a bon ritmu nos seis primeros años (unos ocho decretos cada añu), nel 2011 y 2012 yá nun hubo más qu’ún cada añu, nel 2013 nengún y, no que va d’anguaño, namás otru. Paez lloñe l’oxetivu de tener tolos decretos de toponimia aprobaos nesta llexislatura”.

Pa la XDLA la situación del usu de la toponimia oficial nos conceyos ye inaceptable y indignante: “Hubo tiempu abondo p’adaptar les páxines web a los decretos (en dalgún casu, nueve años) y amás munches fixéronse depués d’aprobaos. Ye un xestu que nun cuesta dineru, namás la voluntá de llevalu alantre. Pa detrás, munchos conceyos tienen servicios de normalización que yá tienen esi trabayu fechu. Esi desdexamientu demuestra’l pocu compromisu de los gobiernos municipales col caltenimientu d’esta parte del patrimoniu llingüísticu y cultural”.

La XDLA va dirixise a caún de los alcaldes de los conceyos incumplidores de la llei pa pidi-yos que corrixan les sos páxines web pa que se pueda ver la toponimia llegal y qu’amás entaínen cola adaptación de tolos lletreros, mapes, planos y documentación municipal a la toponimia aprobada nos decretos d’oficialización.

La Conceyalía de Cultura de Samartín del Rei Aurelio, a traviés de la so Oficina de Normalización Llingüística entama esti añu distintes actividaes pa celebrar la XXXV edición de la Selmana de les Lletres Asturianes, y failo con un programa que se va desendolcar a partir del llunes 5 de mayu y que ya se vien anunciando col cartelu de la semeya cuntando cola collaboración d’editoriales como Asturtoons nes actividaes destinaes a centros educativos del conceyu.

Los actos entamen esi llunes 5 de mayu cola inauguración de la esposición “Asturtoons y les Lletres Asturianes”, una muestra na que se va facer un repasu pela trayeutoria d’esta editorial dedicada a la lliteratura infantil. La esposición va tar abierta al públicu hasta’l día 23 de mayu n’horariu de 9 a 13 h. de llunes a vienres.

Siguiendo colos actos previstos, esti añu celébrase la 4ª edición de los Alcuentros con Escritores, actividá na qu’un grupu d’escolinos o escolinos fala autores sobre ún de los sos llibros, y na que yá participaron n’ediciones pasaes escritores como Lluis Portal, Vicente García Oliva o Adolfo Camilo Díaz.

Esti añu van llevase a cabu dos alcuentros sobre dos novedaes editoriales d’Asturtoons. El primeru d’ellos va tener llugar el martes 6 de mayu na Casona del Bravial a les 10 h. Un grupu d’escolinos y escolines de primeru de primaria del Colexu Públicu El Parque de Blimea van falar col dibuxante y escritor Enrique Carballeira sobre’l so llibru “Una mascota pa Carola”.

Pela so parte’l miércoles 7 de mayu a les 11 h. otru grupu de quintu y sestu de primaria del Colexu Públicu Rei Aurelio de Sotrondio van tratar delles cuestiones rellacionaes col llibru “El misteriu del Vassilius Destounis”, escritu por Jorge Fernández. Los dos grupos participantes nestos talleres van visitar tamién la esposición sobre la editorial Asturtoons de la mano d’Enrique Carballeira.

Durante’l mes de mayu les actividaes d’esta selmana van complementase con una presentación abierta al públicu de los dos llibros mentaos xunto con otru llibru de Xavier Frías Conde de reciente edición tituláu “El misteriu de les histories que s’escribíen soles”.

En resume, unos actos destinaos a averar la llingua y la lliteratura asturiana a les xeneraciones más moces, faciéndolos participar d’un mou activu na conocencia del mundu editorial, los escritores y los llibros.